【被嘲少戲拍】杜汶澤鬧爆DJ 澄清冇食軟飯

杜汶澤自編自導自演的新片上映在即，近日他上商台接受訪問兼宣傳，因被DJ激親令他火都嚟埋，昨日他在社交平台斥DJ問及多年前他與吳君如、劉德華傳不和的問題，今日杜汶澤再以千字文開名怒轟該DJ在訪問前笑指「等咗呢個訪問你嘅機會好耐，你知你幾少戲拍㗎啦！」 講到工作量少都是基於政治立場，杜汶澤感言「我都好貪錢！但係，就好似逆權司機一樣，人，到咗一啲moment ，會因為人性，而忘記咗原來入行嘅目的，忘記咗原本只係想搵錢。」他被朋友疏遠你，被敵人嘲笑，原本1年拍8部戲有近二千萬收入，到1年得1部戲，連飲食節目、KOL都撈埋。杜汶澤講到玩開的朋友都不想甫合照，因怕他的關係影響到內地的生意，他直言：「我心諗，如果我因為做嘢做得唔好，我唔紅，咁我抵死。但係封殺前我做主角嘅戲響香港收三千萬，咁又係咩玩法？但係如果因為我嘅立場而輸，咁我唔會覺得自己羞恥囉。」 提到被媒體寫食軟飯、靠老婆田蕊妮搵銀養家，杜汶澤反駁：「其實我早幾年搵落嘅錢，寫我嗰個，一世都未必搵到！層樓我買嘅食我嘅著我嘅連佢揸緊架Ben屎（Benz）都係我送嘅我點樣食軟飯呀？你今日買咗樓比（畀）你老婆未呀？試過去睇醫生，撞到個八婆，佢叫我唔使咁辛苦，叫個老婆出嚟做咪得囉！如果我叫得郁我老婆出嚟做，我會叫佢做殺手，第一個就殺你個XXX。」 不認輸的杜汶澤感謝疏遠他的人，激勵他花了數年時間考上空手道黑帶，寫了新片劇本，「既然我咁難得有戲上，希望大家多多支持！大家唔使安慰我，我安慰返你！不必懷憂喪志，在艱彌勵，戰鬥到底！」