孖朱晨麗踩鋼線齊失衝 傅嘉莉刮傷前臂嗌救命

傅嘉莉（Kelly）與拍檔朱晨麗昨日拍攝劇集《特技人》的踩鋼線戲份，不慎滑倒的Kelly前臂撞向鋼線再滑落地面，刮出一道血痕，再忍痛拍攝揸槍及三項鐵人戲份，返家後自行塗藥膏時痛到嗌晒救命。 初體驗踩鋼線的Kelly當時戰戰兢兢上場，她說：「著咗對唔合格嘅波鞋，點知今次仲要二人同時打橫行鋼線，雙手要握實對方，好講求合拍度同信任度，第一take嘅時候，我哋都未夾得好好，唔識用力，我先傾向對方，對方未懂得承接我的力度，為怕對手撞向後面嘅鋼索，我下意識縮一縮，情急之下雙雙滑落地面，結果佢夾傷格肋底，我就刮傷手。」 劇組本已安排威吔導師從旁指導，還準備好替身隨時上陣，但意外難以預料。Kelly之後在社交平台再分享感受：「一直知道特技人呢項工作很辛苦和危險，今次親身體驗到佢哋拍出嚟嘅每個鏡頭都是有血有汗。」