【22連勝】「神奇小子」ig貼相報平安 聞終止比賽即崩潰

「神奇小子」曹星如昨日在拳賽中以點數勝出，達成22連勝。左額在作賽時受傷紅腫兼阻礙視力，賽後即時入院觀察。這位「神奇小子」今日在Instagram貼出經包紮後的相片報平安。相中曹星如笑笑口舉起Ｖ字手勢，隔著屏幕都感受到他的勝利喜悅。 曹星如還貼文講述昨晚的比賽詳情及感受，貼文全文如下： 「我喺度同大家報個平安先，我已經返到屋企啦。昨天經過醫生嘅檢查，冇咩大礙，要等啲腫消，起碼兩星期。 琴晚留院觀察嘅時候，我睇咗少少網上面嘅留言，大家好似有少許疑惑，我希望可以解答到各位。 我個傷係因為第二回合，被對手的頭部猛烈撞擊而引致的，而且之後每個回合我都感覺佢不斷腫脹，視野越來越細。由第四回合開始，註（駐）場醫生係（喺）每一個回合都會上擂台邊檢查，問我：『睇唔睇到嘢？可唔可以打落去？』我同教練都即刻回答：『冇問題！可以繼續！』 打到第六個回合打打下，台上裁判突然暫停，叫註場醫生檢查傷勢，再一次問我：『睇唔睇到嘢？』我答：『冇問題！可以繼續！』直到打完第7回合，休息時間，醫生再次檢查，今次醫生一望我，就不停搖頭！沒有問我問題，直接講：『隻眼已經不能夠打開』同裁判商量，第8回合開始前決定終止比賽！ 當下，我立刻爆出一句「Sh*t」開始崩潰了。 因為我同教練在沒有棄權，並因傷勢嚴重的情況下終止比賽，所以我們進入計分判決。 #左眼打不開 #大家放心我無事 #真係要好好休養一番 #期待好返食番餐」