紅館騷休假變加場 楊千嬅為粉絲爭取公售量

楊千嬅年底舉行的聖誕跨年紅館騷，頭4場12月23至26日的門票一開賣就極速售罄；然後加開的12月29至明年1月1日4場門票，昨日開售後都是一早賣晒！千嬅得知好消息，昨晚漏夜於社交平台貼文感謝粉絲支持，大批網民隨即申訴，「兩次公開發售晨早去通利排隊，每次得頭幾個人買到，15分鐘就話賣哂無哂飛。內部認購hold 8成飛，其實點排隊都無意思。做咗千嬅10幾年fans想睇場live show都咁難，咁嘅安排真係好失望」、「就算我支持你，我已經忍夠嗰班黃牛同埋所謂內部認購」、「由你出道支持你到依家，真心想睇嘅fans完全買唔到飛😠黃牛黨搶飛，網絡又大塞，電話打極都唔通，公開發售飛又少」。 千嬅似乎真的看到粉絲訴求，在她努力爭取及付出下，隨即於今日成功宣佈原本打算作為稍作休息的兩天的紅館期，亦會正式成為演唱會期，決定加開12月27至28日2場，答謝追隨她多年的fans。至於今次加開之門票，主辦單位謂會盡最大努力提供更多門票讓fans購買。