衛蘭冇阿妹會抑鬱 靠Jam歌增進家人感情

衛蘭（Janice）作客TVB節目《StarTalk》，接受主播許文軒專訪，大談相隔3年再推出實體唱片感受。Janice説：「今次好享受，但同時又好痛苦，因為之前出碟有人安排好曬，今次自己乜都要參與，為配合唱片更要喺一個月內畫19幅畫，我覺得超越咗自己。」首次與監製舒文合作的Janice，聽聞對方好惡，合作初時亦因達唔到要求而緊張同忟。

Janice表示新碟中首次跟妹妺衛詩（Jill）合唱，她説：「喺我心目中家庭係好重要，我同Jill喺屋企練呢首歌嘅時候唱都喊，太感恩有妹妹喺身邊，如果冇佢我可能會抑鬱。」Janice又說：「爸爸亦影響咗我唱Jazz Music，我地一Jam歌就有Connection，雖然我地性格一啲都唔似，佢仲靜過我，但因為音樂大家關係愈來愈好。」