《夜蒲4》超激肉搏 林珊珊打造校花變「舒淇2號」

《喜愛夜蒲》電影系列扶植過不少年輕演員上位，堪稱新星的搖籃，譬如：首集的陳靜，演技大躍進後，更攞埋最佳女配角；第二集的沈震軒，知名度瞬間飆升，歌影視三線發展；第三集的雨僑，人氣急速反彈。 新一輯的《喜愛夜蒲》，因為劇情圍繞股票幕後玩家，現改名為《私人會所》，同樣找來一班新面孔做主打，包括：前無線藝員陳潔玲及新人湯加文、馮海銳、李任燊等。刺激眼球的場面絕不遜於前3輯，當中以湯加文的肉搏場面最「裸」命！據悉，湯加文的經理人林珊珊，正密謀將她打造成為「舒淇2號」。

現年27歲、林珊珊旗下的新人湯加文，畢業於城大創意媒體系，曾獲雜誌選舉的校花冠軍。在校時，她已參與不少幕前和幕後的工作。其後，她有機會參演鄭丹瑞執導的電影《分手100次》、張家輝執導的電影《陀地驅魔人》等等的演出。 去年尾，《私人會所》的幕後與湯加文接觸，提供的角色，雖然是她從影以來最重戲份的，但亦是她銀幕上最大膽的演出。她憶述：「我有睇舒淇嘅《色情男女》同《半枝煙》，佢有裸露又出咗好少鏡，但你會睇到佢好突出。我有同經理人傾過，我唔係文青，又唔係典型眼大大靚女，係要行一啲特別啲嘅路線。咁我本身都好鍾意舒淇，我會以佢為目標，哈哈！我想畀人睇到我演乜都得，冇任何boundary（界限）嘅。」在戲內，她飾演購物狂護士，既長期被男友虐待，又要與股票莊家發生肉體關係。「我喺現場基本上係全裸，只係前面同重要部位貼咗膠紙。」她又坦承，事前看了大量色情電影作參考，還用了一個月時間操pat pat，每日花一小時做一百下深蹲，令臀部看上去更翹。

戲中除湯加文有超激演出外，前無線藝員陳潔玲所飾演的「媽媽生」，同樣有多場大膽演出，不僅要跟麥子樂床戰，還有一幕自慰戲。提到首次拍自慰戲，她就表示當日導演特別清場拍攝，自己亦做足安全措施，拍攝過程順利。「場戲我拍咗一個鐘，拍之前一定有緊張，因為自己未接觸過呢啲場口，同埋咁大尺度嘅戲啦。仲有導演同編劇要我表現到內心嗰種寂寞，同對幻想對象嘅思念，所以處理呢場戲唔可以係賣弄色情，好講究演技囉。」