笑劉心悠太乖難覓男友 曾志偉：灌醉推佢入房都走返出嚟

曾志偉、劉心悠出席月餅廣告首播會，心悠談到在廣告內彈古箏，但將古箏讀成「古精」，即被志偉笑她：「古精好難彈！點彈？」心悠尷尬傻笑。問廣告中二人是否演情侶？志偉笑指讓大家聯想。問像志偉般的男友是否好冧？心悠勉強點頭笑笑口，表示喜歡幽默男士，外表不重要。

問志偉會否介紹男仔給心悠認識？他笑說：「好難搵，佢百毒不侵，我認識的全是豬朋狗友。」心悠指：「事後（時候）未到。」志偉又笑她說現時是事前，未到事後。心悠謂朋友有介紹異性一起食飯，問她有否發展機會？志偉搶答笑說：「咩叫發展？灌醉推佢入房都走返出嚟。佢係呢行罕有乖乖女，冇咩唔好新聞。懷疑佢有病，做完嘢就返屋企。」談到中秋節怎過？志偉笑心悠就好難過，自己慣常要工作，要追月迎月，中秋不易過，72小時內不可因飲醉被抬走；心悠則坦言與媽咪返台灣與親戚慶中秋。