租置公屋戶疑將冷氣喉對正走廊噴熱風 房署都無符

本港近日天氣熱辣辣，不少家庭都開冷氣降溫。有網民發現，將軍澳翠林邨有住戶將冷氣喉出風位安裝於走廊，每日長時間排出熱氣，走廊充斥熱風未能散去，稱住戶「扮唔知」，並已向房署和食環署投訴。 上載圖片的網民指：「房署話因爲戶主係買左(咗)間屋，所以理唔到，叫通知食環～ 但屋主仍然冇理，繼續放熱氣。」 網民在Facebook專頁「巴打絲打」上載圖片，指「自私自利公屋住戶安裝冷氣機喉係(喺)屋外面，每日長時間排出熱氣，成條走廊充斥住熱風散唔走，家家戶戶都冇辦法開窗開門，真係好影響到人，已向房屋署同食環投訴，但呢家人扮唔知扮冇事發生，食環拍門又冇人應，可以點處理？」 不少網民均批評住戶「無品」，「好自私……投訴要去房署總部會好D(啲)？？其實甘(咁)可以扣佢分嗎？？」亦有網民質疑條喉並非冷氣喉，屬於其他喉類，「似抽油煙機條喉多D。」亦有網民建議向消防求助。