車婉婉幫B仔剝光豬 晒米芝蓮Body操埋老鼠仔

車婉婉的巨B仔「BBQ」已4個月大，B仔出世時重8.9磅，依家已成長到20多磅，日見豐滿。車婉婉一家三口昨日參加親子活動，BB都要剝光豬上陣，見到BBQ又白又肥嘟嘟的「米芝蓮」Body，認真可愛。

車婉婉在社交平台開心分享照片，並留言指BBQ非常活躍又有力，孖老公抱B抱到雙臂癱瘓，她說：「十分肉感的光豬BBQ坐在波波上練習平衡感，還有和其他同年紀BB朋友進行交流，十分高興。運動完畢，BBQ又餓又累，在車上倒頭大睡；而Q MaMa 和 Q PaPa經過兩小時的舉重運動全身濕透，MaMa更雙臂癱瘓」。車婉婉又搞笑指舉B舉到有老鼠仔，為照顧囝囝能健康成長，兩公婆都決定練成一身「好武功」，果然係廿四孝爸媽。