何超儀陪老公練體能　病癒陳子聰跑10分鐘覺辛苦　

何超儀為首飾店開幕剪綵，她笑指本身手指多紋，所以仿效偶像Johnny Depp將10隻手指都戴上戒指遮手紋。提到早前與老公陳子聰出席蘇永康兒子Jazz的百日宴，她大讚Jazz好得意，經已送贈木結他，希望盡快教B仔玩爵士樂。她說：「蘇永康依家好慈祥戒咗銳氣。（老公陳子聰變回模特兒身形會否叫他行騷？）佢著數咗，檻過一大步賺晒，我有盡量推佢出來，希望有人考慮佢。佢把口硬話唔制，我覺得佢肯，依家廿四味都出來拍MV。」

超儀笑指老公早前回歸組合廿四味拍MV，由她構思形象，原本老公指定要著浴袍同波褲，仲買了一條長珠鍊。她說：「我話著孖煙囱，辣啲！再加個髮網感覺污糟啲。」談到老公身體狀況，她表示覺得算是好返，未試過真正開工未知精神如何，不過老公會猶豫出台表演，驚體力支持不到。她說：「佢現在做運動跑步唔可以好似常人跑45分鐘，跑10分鐘已經好辛苦，要谷佢慢慢練上去。（陪老公跑步？）唔見我Fit返少少？我瘦返啲，唔似小露寶，依家好啲。」