3男臣輪咀蝦頭阿田放笑彈　黃翠如：好浪漫

無線新劇《超時空男臣》講「袁崇煥」蕭正楠、「左光斗」曹永廉及小太監「李進忠」何廣沛，從明朝穿越來到現代，鬧出不少笑話。在劇集未播出前已預告楊詩敏（蝦頭）咀勻3位「男臣」，蕭正楠更唔怕女友翠如嬲豬，讚蝦頭「好咀，好回味！」

昨晚《超時空》播出第2集，話咁快就有得睇Kiss Kiss戲。劇情講到飾演片場臨記組長「霞姐」的蝦頭，聘用蕭正楠3人做臨時演員，不過本身係大將軍的蕭正楠唔肯拍下跪戲，連累蝦頭被人鬧；曹永廉問人借手機學習現代的新事物，睇到情侶吵架後，男方錫錫即可令女方唔再嬲嬲。咁啱3人又再激嬲蝦頭，自動波輪咀，令蝦頭下火，仲耍冧話「對唔住，霞姐」，場面搞笑。 之後蕭正楠又使出咀嘴一招對付發火的田蕊妮，咀到拗晒腰扮浪漫愛情劇，再放笑彈。蕭正楠女友黃翠如都有撐新劇，細心Cap晒Kiss戲的圖片，留言話「好浪漫」，有冇呷醋㗎？