陳百祥幫陳法蓉人工呼吸　睇到網民嗌救命：仲扮後生談情

王晶監製的無線劇集《賭城群英會》，風格、劇情令唔少網民都送上負評，話似足8、90年代嘅《精裝追女仔》、《賭聖》，雖然橋唔怕舊，但網民實在唔多受。

噚晚播到第7集，「是旦哥」陳百祥（阿叻）一直保護住「 十三妹」陳法蓉，有一幕係陳法蓉返到屋企哮喘病發作，仲暈倒地上，阿叻去到對方屋企，見佢面青青冇乜意識，就幫口做人工呼吸。之後嘅劇情老套，阿叻送陳法蓉去醫院時遇上車禍，撞到阿叻個頭爆缸，最後無事無幹又去到醫院，包晒頭又傷腳嘅阿叻堅持照顧陳法蓉，結果女方深受感動。 對於66歲陳百祥同50歲陳法蓉「Kiss Kiss」，大部份網民都話頂唔緊，「阿叻唔擅長拍呢啲愛情戲，對話語氣又唔夠深情，帶唔到觀眾投入」、「覺得陳法蓉幾慘，同阿叻kissy kissy」、「阿叻咁老，仲扮後生談情.....」、「救命，一把年紀同陳法蓉談情」。