【白等航班17粒鐘】周柏豪留守機場沖涼瞓覺　丁子高凌晨返閨嚇親千嬅

連日來密密落雨，今日凌晨更一度發出紅色暴雨警告信號，閃電逾2千次。深深感受到「天氣不似預期」的周柏豪、丁子高、衛詩雅咁啱在香港機場相遇，齊齊飛去上海做嘢。但係天雨關係，加上航班延誤再被取消，三位登機後又要落返去機場等消息，足足白等17個鐘至可以上機飛上海。

等到花兒也謝了，周柏豪慘情地表示去機場酒店碰碰運氣，但係幾間酒店都爆滿，返去屋企又只有兩小時休息，最後決定留守機場，在梳化上瞓覺、在機場沖涼。足足在機場食足四餐飯，周柏豪等待航空公司尋找不知所終的行李，依然可以話「心情還是很好，算是不錯的經驗吧」。

另外，丁子高白等航班時，中間時間唯有返屋企抖抖，點知黑夜返閨，嚇親老婆楊千嬅。千嬅不禁上網分享經過：「這幾天丁生要出門工（公）幹，小丁除了跟爸爸説happy Father's Day，更開心的説：好嘢可以黏著媽媽睡。睡到半夜，突然聽到開門聲，然後睡到䑃朧之際，彷彿看到床尾一大黑影，手中持著一點iPhone的電筒，立馬以為有鬼，大叫，原來是丁生回來。那時已是凌晨3點了........鬼故講完。」自嘆是「終極黑仔王」的丁子高已人在上海開工，但係行李仍然留在香港。等足咁耐，丁子高都謝晒，留言話：「#人生如此 #我已經無晒感覺 #平常心 #仲可以點呀 #iLoveShanghai」。