巡視酒樓業務　陳錦鴻冧客拉生意

陳錦鴻10年前拍落嘅劇集《蘭花刼》，無線最近就喺倉底挖返出嚟，仲擺黃金時段播放，舊劇得以重見天日，身為男主角嘅錦鴻，義無反顧返娘家幫手做宣傳，認真唔話得。 雖然「港視」嗰邊開台唔成，錦鴻一直「停產」冇劇拍，但佢並唔係完全冇嘢撈。早年，佢已經喺尖沙咀開咗間潮州酒家，近一、兩年仲喺黃埔同廣州開多兩間，喺飲食界大展拳腳。

早排，錦鴻喺佢尖沙咀嗰間酒家出現，同埋老婆杜雯惠去返自己地頭開餐，睇得出佢都好緊張啲生意，順便四圍行巡視業務。期間，有啲熱情客人見到錦鴻都好驚喜，猛同佢打招呼say hello，而佢亦都好識做，笑到四萬咁口走埋去冧客，仲聽到佢猛咁叫人多多幫襯，認真落力拉生意。