吳綺莉母女出動心情大好　卓林自殘鎅痕睇見都心痛

吳綺莉於3月23日遭女兒吳卓林報警稱涉嫌恐嚇，之後卓林一直離家並曾外遊，期間急返港驚傳自殺入院，留院兩個月後卓林日前終獲准出院返家。今日中午約12點半，吳綺莉母女與傭人一齊離開大坑寓所，駕車到大埔舊居。行車時見卓林一邊聽歌又玩手機，心情看來相當不錯；不過見卓林左前臂都是自殘鎅痕，睇見都心痛。 約1小時後座駕抵大埔，3人先到舊居附近小店購物；卓林先下車步入小店，期間問到精神如何？她笑笑說：「OK啊！OK啊！噚晚1點瞓，瞓到今朝11點。（嚟買嘢？）係啊！嚟買嘢同食嘢，拜拜！」隨後吳綺莉亦步入小店，手持電話的她正跟陳姓姑娘談話。她說：「知道，知道，唔該晒你陳姑娘。」問到囡囡已回家，是否感到高興？她說：「咁梗係開心啦！一樣一樣處理，唔該晒！辛苦晒，天氣好熱啊！（處理舊屋事宜？）係啊！係啊！都搞咗幾個月，一樣一樣嚟啦！（卓林需要複診？）一路都會，進步中，感恩！」她們約於小店逗留10分鐘，期間卓林步出小店買蒸餾水，亦跟在場記者稍作交流；吳綺莉更問在場記者需不需要冰水？並叮囑天氣酷熱需要小心。離開時，她們大方應記者要求合照。

1時50分駕車到達大埔舊居家門，笑容滿面的卓林不時反拍記者。下車時，記者要求卓林接受訪問，她接過咪高峰欲開始訪問，吳綺莉卻示意不要接受訪問。卓林笑說：「Mum，OK！阿媽叫我走，我走！」記者再度邀請兩人接受訪問，她們表示同意。吳綺莉說：「多謝關心！處理緊問題，OK嘅！你知依家都市人都有情緒問題，咁盡量解決問題啦，都會繼續複診，OK嘅！OK！（卓林幾時返學？）暫時未知，因為真係啱啱出院，盡量安排啦！（會轉校？）有咁嘅可能性，但真係未知，要睇各方面決定。」問到卓林心情如何？卓林說：「OK啊！無嘢，依家返到去都好開心。」問到會否去旅行更加互相了解？吳綺莉說：「暫時未有時住，因為屋又未搬，有好多嘢未做，始終想處理好屋企嘅嘢先。」（攝影：李樹勳）