Kelly Online：被批廣告侮辱體育專業　歐鎧淳凌晨解釋「3分27秒」成績

「美女魚」歐鎧淳早前為一家米線連鎖店拍廣告，但有博客撰文質疑片中提到「3分27秒」（片中為3分29秒）嘅訓練時間，認為佢嘅體育專業受侮辱卻無出聲，更稱無能力所以要喺娛樂圈「拋頭露面」。 歐鎧淳凌晨喺社交平台撰文回應，贏得網民讚賞。歐鎧淳解釋，「呢個時間字面上並唔常見，因為呢個係我練短池十個三百自嘅平均目標時間。每一個訓練都有佢既目的，至於片中點解係三百唔係四百；第一係令訓練有多一啲變化，第二可以延長高速度嘅時間。微電影係以我目前訓練為藍本，所以唔係就咁衝一個單次嘅時間。如果只係衝一個三百米，得到嘅強度耐力效果唔高，我教練同我追求嘅係平均速度。加上我係嗰種比賽游得快過訓練嘅泳手。簡單啲講，即係從來冇喺訓練時，游到過我任何一個最佳時間，變相攞比賽時間作對比就變得冇乜意思。」 佢又重申點解要「拋頭露面」，係希望令大家「見到更多運動員嘅身影。我相信只要俾機會佢哋，就會有多樣性嘅發展可能。」 歐鎧淳嘅回應獲得不少網民留言支持，認為佢講出重點，回應得體。