胡杏兒BB契媽排名齊晒　傳黃智雯爬姚子羚頭結婚

現年37歲的胡杏兒與老公李乘德（Philip）結婚年半，一直恨生B的胡杏兒昨日趁母親節宣佈成功「造人」，更與Philip到馬爾代夫歡度Babymoon。一眾「胡說八道會」的好姊妹做硬契媽，更幫胡杏兒BB改花名為「Baby Lee」，今日五位契媽完整名單出爐，由胡蓓蔚（豹嫂）當大契媽；二契媽係姚子羚，仲搞笑留言：「Lee，你要乖乖地聽媽咪話～ 我哋五個契媽錫晒你，二契媽嘅見面禮就係咬你屁股仔一啖」。 三契媽李施嬅對未出世的Baby Lee發表「愛的宣言」，她留言：「BB，你大鑊喇，有五個傻婆，準備要不停咁錫你。錫晒你。」熱愛健身的四契媽胡定欣已諗定陪BB練腹肌；黃智雯則當上細契媽。

「胡說八道會」之前已密密開會，講明有大計，原來就係胡杏兒宣佈佗B。不過有傳大計唔只一個，日前的開會合照中，姚子羚坐正中間十足女主角，令人懷疑她與男友「的士邦」鄭子邦好事近。不過又有指主角其實是黃智雯，爬姚子羚頭跑出做人妻，同拍拖近4年的珠寶集團高層男友詹文天計劃拉埋天窗。