冇第4集？余文樂叫人支持「告別作」：有得睇就睇啦

楊千嬅，余文樂、導演彭浩翔不停為新片《春嬌救志明》宣傳，上映6日，香港票房突破1246萬元，內地票房已衝破1.13億元人民幣。 千嬅和余文樂花盡心思完成拍攝，日前終於「拍住拖」欣賞新戲，散場後千嬅眼泛淚光：「好感動，呢幾個月喺片場受嘅欺凌都值得！」余文樂則重演戲中爛gag，上下打量千嬅，然後遞上紙巾說：「你濕晒喎！」他表示睇好千嬅繼上集攞影后，第3集將再下一城，千嬅反而對余文樂和導演攞獎有信心。二人均透露拍戲時不知對方怎樣演，但8年來已培養了默契，因此演得順利，很有成功感。不過余文樂竟然說：「大家一定要嚟支持，應該冇下鋪，有得睇就睇啦，告別作呀吓！」千嬅追打他：「我啋過你呀！」

另外，千嬅與彭浩翔昨晚切蛋糕慶祝票房破億，今日二人已抵達成都宣傳新片，兼且去親親大熊貓。二人穿上全副保護衣拍照，餵熊貓開餐，千嬅餵水果時，成功吸引其中一隻熊貓張口進食，並搞笑地叫萌爆熊貓為「嬌嬌」。