余文樂開工嬲爆爆玩自閉　等志偉打邊爐「探監」

余文樂及曾志偉作客節目《StarTalk》，接受主播許文軒（Edmond）專訪，大談拍攝電影《一念無明》及獲金像獎提名的感受。首獲金像奬男主角提名的余文樂，他説：「我認我恨過攞奬，以前有諗過著住踢死兔坐喺頒奬禮台下，但之後唔敢再諗提名，覺得好似冇乜緣份咁，我入行15年，拍過70幾部戲，今次有提名覺得好合時。」樂仔又說：「以前好多導演同自己講30歲之後，先至開始正式叫做拍戲，當時我心諗，你唔搵我拍戲可以出聲，唔好用呢啲咁玄嘅藉口，以前我諗唔通，但依家35歲我諗通咗。」 曾志偉直言曾有一刻想不接拍，他說：「我唔想拍呢啲咁沉重嘅戲，自己拍戲想開開心心，所以成日拍喜劇，自己又可以笑一餐。我都為樂仔辛苦，去到片場佢嬲爆爆咁，為咗入戲匿埋喺房，講嘢都未大聲過。」樂仔說：「拍戲時我好少同志偉傾偈，因為一同佢傾偈又開心返晒。我喺片場志偉幾乎日日都打邊爐，佢就好似探監咁，淥好啲嘢食拎入房畀我。」 電影講述家庭關係，樂仔表示以前同爸爸媽媽感情唔好，他說：「我細個唔係同阿爸阿媽住，因為佢地要返廠工作，佢哋話我嘅時候我會還口，話返佢哋有咩資格話我，當時我阿媽喊到成個豬頭，大個先知，原來佢哋有難處，依家我成日陪佢哋。」