你Loop咗未？　10大百看不厭經典賀歲片

每逢新年都有賀歲片上映，片種都以輕鬆、幽默為主，志在一家大細、男女老幼入場睇戲笑返餐。今年有乜賀歲片睇呢？周星馳監製、徐克執導的《西遊伏妖篇》，屬於古裝魔幻喜劇。港產片有鄭丹瑞、周秀娜的《小男人週記3之吾家有喜》，小男人梁寬重回大銀幕，又係咪你杯茶？仲有林盛斌的《我要發達》，睇卡士以為自己買飛入場睇TVB。 冇心水唔緊要，睇返經典賀歲片依然可以笑到Gap Gap聲，明明睇咗N次，對白都識背，一到新年總會心郁郁無限loop。 1. 家有囍事系列 《家有囍事》、《97家有囍事》真心必睇，星爺、張國榮、張曼玉，卡士強勁，無厘頭爆笑金句「無定向喪心病狂間歇性全身機能失調症」、「巴黎鐵塔反轉再反轉」、「乜又係你呀陳生！」、「人生有個真正朋友的確好極」、「邊個淫蕩？你淫蕩！」深入民心的程度，同朋友傾偈時都總會忍唔住講幾句。 2. 《行運一條龍》 陳曉東、舒淇扮情侶，仲有葛民輝戀上楊恭如，兩條感情線都幾搞笑。最經典一定係吳孟達形容戲中的吳君如係「年初四咁樣」:「年初四，假又放完，錢又使晒，工又要返，點會有好樣呀？」 3. 《嚦咕嚦咕新年財》 「人品好，牌品自然好」，新年同親友決戰四方城時，有冇諗起呢句？《嚦咕嚦咕新年財》由劉德華、劉青雲、古天樂合演，內容圍繞打麻雀，夠晒新年氣氛。 4. 《喜劇之王》 星爺的《喜劇之王》，有指係講返佢早年的演藝生涯，呢套戲仲捧紅埋「柳飄飄」張柏芝。 5. 《行運超人》 由梁朝偉、楊千嬅、鄭中基主演，講奸人同好人以風水玄學大鬥法。其實偉仔做喜劇真係別有一番味道，有種特別的喜感。呢套戲亦係楊千嬅、鄭中基分手後合作的第一套電影。 6. 《逃學威龍3之龍過雞年》 呢套戲已經係24年前的雞年賀歲片，當中星爺同梅艷芳的對手戲有笑有淚。 7. 《富貴逼人》系列 驃叔驃嫂一家人的生活最貼近星斗市民，董驃、沈殿霞亦演得到位，成個系列有《富貴再逼人》、《富貴再三逼人》、《富貴黃金屋》，有排你睇。 8. 《八星報喜》 「發哥」周潤發在片中扮娘娘腔，有女友都死性不改，見索女就追，演技令人發笑。 9. 《射鵰英雄傳之東成西就》 由王家衛監製、劉鎮偉執導，以《東邪西毒》班底拍攝而成的笑片，偉仔孖潤腸的搞笑樣，應該冇人唔記得。 10. 《天下無雙》 有超強明星陣容，王菲、梁朝偉、趙薇、張震、朱茵.....本片一樣無厘頭，但又道出愛情的「鏡花水月」。