你Loop咗未？　10大百看不厌经典贺岁片

每逢新年都有贺岁片上映，片种都以轻松、幽默为主，志在一家大细、男女老幼入场睇戏笑返餐。今年有乜贺岁片睇呢？周星驰监制、徐克执导的《西游伏妖篇》，属于古装魔幻喜剧。港产片有郑丹瑞、周秀娜的《小男人周记3之吾家有喜》，小男人梁宽重回大银幕，又系咪你杯茶？仲有林盛斌的《我要发达》，睇卡士以为自己买飞入场睇TVB。 冇心水唔紧要，睇返经典贺岁片依然可以笑到Gap Gap声，明明睇咗N次，对白都识背，一到新年总会心郁郁无限loop。 1. 家有囍事系列 《家有囍事》、《97家有囍事》真心必睇，星爷、张国荣、张曼玉，卡士强劲，无厘头爆笑金句「无定向丧心病狂间歇性全身机能失调症」、「巴黎铁塔反转再反转」、「乜又系你呀陈生！」、「人生有个真正朋友的确好极」、「边个淫荡？你淫荡！」深入民心的程度，同朋友倾偈时都总会忍唔住讲几句。 2. 《行运一条龙》 陈晓东、舒淇扮情侣，仲有葛民辉恋上杨恭如，两条感情线都几搞笑。最经典一定系吴孟达形容戏中的吴君如系「年初四咁样」:「年初四，假又放完，钱又使晒，工又要返，点会有好样呀？」 3. 《呖咕呖咕新年财》 「人品好，牌品自然好」，新年同亲友决战四方城时，有冇谂起呢句？《呖咕呖咕新年财》由刘德华、刘青云、古天乐合演，内容围绕打麻雀，够晒新年气氛。 4. 《喜剧之王》 星爷的《喜剧之王》，有指系讲返佢早年的演艺生涯，呢套戏仲捧红埋「柳飘飘」张柏芝。 5. 《行运超人》 由梁朝伟、杨千嬅、郑中基主演，讲奸人同好人以风水玄学大斗法。其实伟仔做喜剧真系别有一番味道，有种特别的喜感。呢套戏亦系杨千嬅、郑中基分手后合作的第一套电影。 6. 《逃学威龙3之龙过鸡年》 呢套戏已经系24年前的鸡年贺岁片，当中星爷同梅艳芳的对手戏有笑有泪。 7. 《富贵逼人》系列 骠叔骠嫂一家人的生活最贴近星斗市民，董骠、沈殿霞亦演得到位，成个系列有《富贵再逼人》、《富贵再三逼人》、《富贵黄金屋》，有排你睇。 8. 《八星报喜》 「发哥」周润发在片中扮娘娘腔，有女友都死性不改，见索女就追，演技令人发笑。 9. 《射雕英雄传之东成西就》 由王家卫监制、刘镇伟执导，以《东邪西毒》班底拍摄而成的笑片，伟仔孖润肠的搞笑样，应该冇人唔记得。 10. 《天下无双》 有超强明星阵容，王菲、梁朝伟、赵薇、张震、朱茵.....本片一样无厘头，但又道出爱情的「镜花水月」。