Tesla銷售數據分析 股價挑戰500難唔難？｜晉佳
2024-12-31 15:15 
2024年最後一個交易日，最值得回顧嘅係，美股市場規律喺一年間，變化嘅速度比過往為快，其中一個能夠諗得到嘅原因，或許係AI正在加快改變市場。
喺之前10月至11月份，美股公布今年第三季業績，唔少業績發布後嘅市場反應出乎投資者意料之外，即使業績曝光，都估唔到股價係升係跌，反應變得更隨機。最經典莫過於Tesla（TSLA）10月23日公布業績，收入遜預期而每股盈利勝預期，翌日股價上升22%。或許市場已經洞悉到第四季Tesla喺中國嘅銷售繼續暢旺，能夠預早預測第四季收入上升、同時成本下降嘅雙利好形勢，配合一連串好消息包括特朗普勝選、自動駕駛FSD V13.2推出、FSD準備進入中國市場等等利好因素，將股價推高至接近500美元水平。
不過，近期開始感受到Tesla股價轉弱，連日跑輸博通（AVGO）及英偉達（NVDA）呢兩隻市場資金競爭對手。
快公佈第四季交付數據
嚟緊假期後嘅1月2日，Tesla將會公布第四季交付數據，目前市場預測交付量為51.2萬輛，較第三季增長2.8萬輛，而中國市場喺10月及11月已經按年增長2萬輛，假如中國繼續增長勢頭就至少符合預期？但數據顯示Tesla由上海廠房出口嘅數字顯著下跌，唔排除喺中國市場以外嘅銷售表現一般，為銷售數據帶來變數。
今次交付數據亦會影響市場對於Tesla在1月下旬公布業績嘅睇法，目前市場預期每股盈利0.96美元，比起近年最低季度每股盈利0.45美元，反彈逾一倍，同時股價由今年首季公布業績前低位亦已回升2倍，可以話，目前股價充分反映業績反彈嘅因素。
Tesla利好消息喺過往兩個月連珠爆發，即使自動駕駛及機械人業務帶來長遠憧憬，但目前能夠支撐股價繼續上升嘅子彈減少，而Tesla同英偉達（NVDA）嘅股份成交差距亦一路收窄，假如後者出現好消息令股價上漲，亦會抽走Tesla資金，令Tesla股價受壓，要1月再挑戰500大關，難度不低。估計喺1月下旬公布業績之前，除非FSD進華方面又有利好消息，否則仍有機會等待Tesla更低水平吸納，反而英偉達係更好嘅短期選擇。
晉佳
相關文章：
最新回應