不再買樓收租 但心思思想買車位｜曾智華
2024-12-17 13:46 
做包租公從不是我杯茶，以前試過幾年，以後咪搞，因為煩到抽筋。
簡單來說，遇上個衰客，真係會人都癲。不但拖租唔畀，就算最後成功趕佢走，也會搞到間屋變災場，垃圾堆滿不止，若是破壞狂，更會將所有渠道搞到塞晒，簡直變態。
就算質素好少少的，也可能不停搵你，呢時話冷氣機唔凍，嗰時話窗台滲水，總之就當我係「七仔」，奉旨24小時應酬佢，點搞？
買領展好過買樓收租
老友，小弟假假地都屬專業人士，每小時的「身價」，凡應酬你一次，咪等於冇咗半個月租？終於下定決心不再以收租作投資收入，只買入領展房產基金（823），做全港最多商場及停車場的間接包租公，但一切免煩。
你唔好問我，究竟買領展是否精明投資，當然未必係，但我買領展由10元開始，如今持有平均買入價為30元，計埋20年利息，早已回本。
怕收租是怕煩，但最近小弟又有點心思思，不是買單位收租，而是買車位。車位好處是冇客敢拖租，只要你唔交租，我落鎖等你冇得泊即可；也不怕破壞王搞塞渠等小動作，可以乾手淨腳。
路邊車長期食「牛肉乾」
引起興趣皆因家居附近越來越多住宅落成，全部一係冇，一係唔夠車位。加上街上車位不足，故長期見路邊車食「牛肉乾」。
兩日前行過靠背壟道一間花店，門口貼了「豪華住宅車位出售」招紙，叫價115萬元，咦好似有啲平喎，立即上網翻查市價。原來此大廈車位經常有人炒出炒入，近年由110幾萬到150幾萬都有交易過，今次登出的車位，可能是炒燶的銀主貨，於是走訪相熟地產代理問吓背景。
地產代理話，「個客係炒家，最初開190萬，搵鬼睇咩，減吓減吓咪減到115萬囉，但係個車位在2、3樓，要搭電梯唔太方便；租就一定租得出嘅，三千蚊鬆啲啦，但記住要畀管理費㗎」。
制唔制得過呢？揸住個車位每年有約3厘收入，另外再博有機會升值，我諗應該都跌到差唔多掛？
返屋企問吓老婆大人點睇先？老婆大人斬釘截鐵答：唔好買！
資深傳媒人 曾智華
相關文章：
韓國經濟實況 比大家想像中差更多 李聲揚：若香港叫蕭條 韓國不知叫甚麼了
最新回應