梁詠琪完成5場sidetrack音樂會感覺人生解鎖 歌迷完場拒離座 臨時加唱鋼琴版《灰姑娘》

一連5場《梁詠琪 時間遇上我們～專屬的特別》Side Track音樂會，昨晚圓滿結束，Gigi梁詠琪特別為尾場觀眾額外送上《哭了》和自己作曲的《同班同學》，但現場觀眾依然意猶未盡，完騷仍拒絕離場，不斷嗌encore，最終Gigi再度上台，在音樂總監趙增熹即興鋼琴伴奏下獻唱經典歌《灰姑娘》，全場大合唱，為5場Side Track音樂會完美落幕。

Gigi太投入表演感動哽咽

完成首個在香港舉行的全廣東歌Side Track音樂會，Gigi以「人生解鎖」來形容，她說：「因為未試過搞一個小型、主力唱side track歌嘅音樂會，今次的歌單特別有感覺，例如我揀嘅成長三步曲，《好不好》、《因果》、《等人》，這些歌很出色，我不時都會攞番出嚟聽，有好多回憶喺裡面，揀歌方面自己就好滿足，當然歌迷依然有海量嘅要求，哈哈！真係唱唔晒呀。」提到最難忘的畫面，Gigi坦言是在第四和第五場，因為太投入整個舞台表演而感動哽咽，很多感覺湧上心頭，「例如今晚唱《好不好》，我只是好投入去唱，但突然間，唱到某句歌詞，點知好想喊，要即刻㩒住自己，唔好太過激動，因為會影響唱歌。仲有第四場唱《迴旋木馬的終端》，因為見到有台下歌迷流淚，我又忍唔住，而且呢啲歌陪住我好耐，亦都陪住佢哋，呢幾晚我哋一齊製造咗一個回憶嘅畫面，用『感動』都形容唔到。」

Gigi大曬陳年舊相。

Gigi提到最難忘的畫面，是在第四和第五場。

Gigi與演唱會幕後團隊。

Gigi表示太投入整個舞台表演，一度感動哽咽。

Gigi又邀請了同公司的小師弟，在台上演獨腳戲。

Gigi表示在執拾家裡物件時，回想起一幕幕舊事。

Gigi與小師弟Henry陳獻略。

Gigi表示唱到自己都唔捨得走。

小師弟多謝Gigi信任

今次Side Track音樂會，以「回憶」作為主軸，將戲劇元素加入舞台，她邀請了同公司的小師弟Henry陳獻略，在台上演搬屋的獨腳戲，在執拾家裡物件時，回想起了一幕幕的舊人舊事舊片段，「我同Henry一齊喺舞台，製造了一個平衡時空，雖然冇交匯過，卻反而製造一種『觸不到的距離』的美，我覺得Henry做得好好，又要彈結他又要做戲，我見到佢有段戲眼濕濕。」在旁的Henry說：「首先要多謝Gigi 嘅信任，同埋我好鍾意個故事，其實我搬屋嘅時候，思緒都會好複雜，所以好容易代入到個情景裡面，其實綵排嘅時候，一聽到《春逝》我已經喊咗出嚟，同埋每晚我感覺都好唔同，情緒會有唔同起伏，每晚嘅演繹方式都有唔同。」

Gigi與歌迷全場大合唱《灰姑娘》

來到Side Track音樂會最後一場，Gigi特別派福利，額外唱出《哭了》和自己作曲的《同班同學》，但完場後歌迷依然唔捨得走，不斷大叫Encore，最終Gigi唱《灰姑娘》作結，更與全場歌迷大合唱，她說：「其實《哭了》喺我side track入面，本來沒有特別鍾情，當年亦冇主打，但呢十幾廿年，歌迷不斷要求我唱，漸漸令我都留意番呢首滄海遺珠。多謝歌迷令呢首歌由遺珠成為我們的經典，所以尾場一定要再唱，同埋我冇諗到，佢哋真係坐喺度唔走，不停嗌encore，搞到紅館show咁，一於送多首《灰姑娘》大家開心。以為要清唱，點知趙增熹即興加入伴奏，好犀利！送多首安靜版《灰姑娘》，見到大家都滿意同開心，搞到我自己都唱到唔捨得走。」