繼續飲維他奶｜曾智華
2024-11-19 15:15 
上周四早上掛八號風球，以往情況全城休市，金融機構停止運作；不過政府年中決定開始新政策，打風不停市，配合全世界大勢，於是上周四正是第一次八號風球下股市照開。
我就傻吓傻吓唔記得，夾住幾份報紙在茶記慢慢歎，久不久才瞄下手機。開市不久突然幾十條訊息彈出，全部通知我：「喂喂碌Sir，你之前介紹隻維他奶國際（345），今日（上周四）朝早雖然大市跌，但佢又爆上新高呀！知唔知點解呀？應否食胡呀？」
大成交向上要留神
個個都問同一問題，全屬散戶心態！唔講唔講還需講，今期真係欲罷不能，惟有第3次「飲維他奶」，再向大家分析一下。
一隻股票的基本走勢會有顯示，若大成交而股價向下就應該走嘞，因可能有大戶在出貨。相反大成交配合股價不停升，而隻股又非炒股，咁就要留神了，可能有大勢力正在全方位掃貨。
點解狂掃？當然有緣有故有後着，散戶好難知，但遇上這種現象，理應升完再升。
小弟上周8.8元推介維他奶，純因客觀分析，這間歷史悠久而又老老實實營運的公司，擁有良好品牌及堅固銷售網，只不過遇上一件不幸事件，加上管理層老化欠活力，近年股價才一瀉如注，好「抵買」！因睇清楚，佢並非遇上甚麼「不治之症」。
行家郁手 效應更大
當然若是其他行外人，真係畀你都唔敢亦唔識接手。但飲品集團大行家又如何？
舉例若可口可樂一聲話入股維他奶，肯定股價立即似火箭般上升，因可樂近年銳意發展汽水以外飲品市場，執到維他奶的話，協同效應可以極其厲害，其實可能早已有人在枱底講數中。
同一思維，楊協成乃雄霸東南亞紙包飲品市場的巨企，唯獨豆奶一瓣唔夠維他奶「鍊」，如今眼見維他奶股價跌成咁，仲唔郁手？
郁手可分兩種做法，一是善意磋商，買賣有偈傾，傾出個皆大歡喜價；另一做法是敵意收購，先在市場密密收貨，收到咁上下才公布，睇吓邊個財力更勁？無論用以上邊種方法，維他奶股價都必定飛升。
資深傳媒人 曾智華
相關文章：
最新回應