UNi收AL Edan歌唱導師建議月底表演威返次 史上最強走音女團慘被家人笑埋一份丨獨家
2024-10-21 07:00 
香港自資新女團UNi在出道發布會演繹處女作《NOW》，因瘋狂走音兼甩舞，被《頭條娛樂》FB Page「發掘」兼賜名「懲罰系女團」，全城圍笑，「威水史」傳到台灣及馬來西亞。20歲隊長SZECHING（何思澄）、29歲Silver（楊月銀）、21歲Yammi（麥愷彤）及23歲Seeing（吳思凝）坦認表演完全唔合格，但知恥近乎勇，認為負評是推動進步的動力。本報搵來Anson Lo及Edan的歌唱老師Guddy提供改善歌藝建議，她們即要抄低跟住練，望月底公開表演時一雪前恥，變成「獎勵型女團」。採訪：杜杜 攝影：朱偉彥 場地:三朗。燒肉
UNi由曾在韓國當練習生兼曾以女團「Spiral」出道的SZECHING發起。她在ig挑選超過100個志同道合女仔，再揀了30人面試，最終搵到朋友Seeing及互不相識的Silver及Yammi組團。29歲曾以女團「HKG」出道的Silver笑言見到對方出ig post以為詐騙，最後被SZECHING一番話說服，「我話我年紀比起佢大，唔介意咩？佢話追夢嘅心，咩年紀都一樣，俾佢呢句嘢打動咗。」Yammi認為SZECHING有晒計劃書好有誠意，「個proposal係10幾20頁，每樣Budget都寫得好清楚，未來發展有晒計劃，唔係盲舂舂。」
自評30分認完全唔合格
大半年前，4人以每月夾錢形式成軍，現已花了6位數製作處女作《NOW》、拍MV，並邀請了經理人及宣傳人員。出道發布會亦是隊員負責搞，她們坦認當日冇作現場綵排，SZECHING說：「第1次出騷，對流程冇經驗，但我哋之前嗰晚有練到深夜。」然後她們又照平時練習方式演繹，「平日都係用冇人聲練習，決定照練習咁用live去唱。」對於當日表現，她們都認同完全唔合格，最有經驗的SZECHING只畀40分，「畀自己份勇氣，仲想畀團員，冇佢哋幫手，我一個冇可能完成到。」同樣畀自己40分的Yammi，好自責冇發揮到練習水平，「自己solo嗰part得2句，都做得唔好。」Silver和Seeing都只給30分，前者認為只屬勇氣分，「我哋一落台就知唔達標，好嘅表演除咗畀觀眾認可，都要過到自己嗰關。」
被父母叫「粟米肉粒飯」
對於被全城恥笑，她們自責多過難過去喊，女團出身的SZECHING特別嬲自己，「明明我睇落去係最有經驗嗰個，但點解做到咁㗎？！」對於被封「懲罰系女團」，Silver希望有日會令外界改觀，「懲罰完後，希望feel到我哋係有獎勵，有日成為獎勵型女團。」而事件連台灣媒體都有報導，Silver坦認始料不及。她們又感激網民提點，SZECHING說：「我出咗嗰篇千字文後，有網民打返千字文留言，話畀我聽有邊度可改善，列咗好大段建議畀我，好感動。」4人又笑言家人恥笑多於擔心，而Yammi父母反應最搞笑，「佢哋得閒會問吓我『點呀！粟米肉粒飯，哈哈！』」哥哥亦明寸她是流量密碼。
揀唱飲歌全部都高難度
本報搵來曾任MIRROR的Edan 以及Anson Lo、Stanley、Jeremy、Ian、Tiger、AK和Lokman的歌唱老師Guddy，向UNi提供歌唱技巧及改善建議。他先評組合的發佈會表現，「聲音訓練未足夠、導致虛弱、無力、共鳴不足、聲區缺乏發展、聲線不穩定等等，團員發聲能力及技術不一致，導致合唱未能融和，歌曲本身難度太高、很難發揮；跳唱技巧亦不夠， 有些動作影響了歌唱穩定性，需要在舞蹈及唱歌找到個平衡。另外，音樂不夠『底』， 所以演唱所有Chorus 時破綻都原形畢露，沒有經驗及訓練不足的演出者會好容易失誤，而歌曲分唱分佈效果亦唔好，未能發揮不同團員聲音上好處。」Guddy建議UNi要衡量錄音版本和現場演唱在唱法上的分別，「要做足熱身、暖聲練習，顯然聽到未準備充足。」UNi好認同老師意見，Yammi說：「好想cap低佢個comment，再返去練習。」因為想知她們的個人實力，要求4人各自選唱一小段飲歌，SZECHING唱Dear Jane的《到底發生什麼事》；Silver唱衛蘭《驗傷》；Yammi唱方皓玟《你是你本身的傳奇》和Seeing唱 ToNick《長相廝守》，確實有好大進步空間，UNi月底有公開演出機會，希望到時可一雪前恥。
最新回應