阿Sa百億舊愛孖情侶Friend睇城城尾場石恆聰偶遇女友人體貼舉動𠱁死人丨獨家

2024-09-04 06:00

去年8月，星島《名人雜誌》獨家披露蔡卓妍（阿Sa）跟富三代「百億麻將館太子爺」石恆聰（Anthony）結束6年情，更指男方搭上陳靜(DaDa)及2022年港姐季軍梁超怡，事後阿Sa大方承認跟太子爺已和平分手，不涉第三者，仲話戥舊愛慘，一直被誣衊。上周二晚，穿上一身低調黑色的Anthony同情侶Friend去睇郭富城演唱會尾場，Encore環節全場企晒起身，太子爺周身擰期間見到坐附近的女友人，即行前拎手機主動自拍，佢仲識得借舞台作背景，醒目仔嚟。採訪:廖思慧

Anthony主動拎手機影合照，相中人笑得開心，背景啲人又好開心。

影完即係Send返畀女友人

阿Sa分手後自爆同Anthony再見亦是好好朋友，對方更搵佢訂Twins演唱會門票，如果男方真係衰腳踏幾船，關係應該唔會係咁。分手後，阿Sa透過瘋狂旅行治情傷，日前佢就上載兩件頭泳衣靚相，晒零肚腩身材，睇嚟失戀狂食唔太關佢事，情傷應該好返晒。

阿Sa同Anthony拍拖6年，有傳聚少離多而分開。

阿Sa當年帶石恆聰賀阿嬌結婚

阿SA早前上載泳衣相話要留倩影

真人幾靚仔
當晚演唱會尾聲，城城唱住美心月餅廣告歌不斷喺個台來回咁行，觀眾企晒起身郁身郁勢，發現太子爺身旁有個著住印有演唱會名外套的工作人員，然後男方拍手四圍擰時見到女友人，即上前拎自己手機主動自拍，還借城城做背景，影完仲即係Send返畀女友人，自拍一條龍勁窩心。之後返埋位繼續拍拍手，情侶朋友嘅男方掛住影360全景而仆親，太子爺眼明手快即刻扶住，仲拍拍對方膊頭示意小心啲。當城城仲唱住「想見便遇見，oh la la la la」，胳肋底夾住樽水嘅太子爺經工作人員Lead住離開，應該準備入後台同城城影合照，路過女友人附近，佢又識做哋大聲講Bye Bye，份人幾Warm喎。