謝東閔唔Care再被嘲諷「綠帽俠」賀離巢TVB 感激Haters肯花10秒留言恥笑：我真係多謝你 丨獨家
2024-08-23 07:00 
38歲謝東閔(Brian)月初突然宣布離巢TVB，話晒14年感情，所以感慨出Po「希望將來再見」。Brian學到做戲技能，又學識做人，最重要凡事睇得好開，呢點非常唔容易，所以對TVB好感恩「俾人鬧完下次咪學精囉。」對於口臭網民挖返女友朱智賢「偷食蛋糕」事件，回帶嘲諷「綠帽俠」賀他離巢，因為唔睇網上留言8年，Keep住保到平安的Brian唔嬲之餘仲為網民著想：「香港經濟唔好，啲人壓力好大，畀佢哋發洩下都OK嘅。」甚至多謝Haters願意留言畀佢，壇數勁高。採訪：方騫平 攝影：譚志光 場地：Variety Music Academy音樂學校
010年《超級巨星2》入行的謝東閔，拍過多套劇集又唱過唔少劇集主題曲，年初播出的《本尊就位》更「升呢」做男一，本來大好前途。可能見去年11月朱智賢離巢，Brian亦步女友後塵出去闖吓。
否認有錢仔傳聞
談到離開原因，Brian直言跟TVB路向唔同，他想唱歌及演戲，卻得唔到承諾，故不想浪費時間停留但同時又好唔捨得：「由於走得突然，趕唔切跟同事道別，所以『分手』後曾重返TVB一次，始終喺呢個地方唔係短時間，由一張白紙開始成長，學懂演戲及待人處事，仲識到一班好兄弟，張振朗鼓勵我要『加油』，不論朋友及事業上亦有得著，當行到停車場準備離開時，忍唔住流咗幾滴眼淚。」他強調跟TVB關係仲係好好，更指公司一直給他機會，從冇待薄過佢，收入OK維到生，還特別為自己澄清唔係賺錢買花戴：「一定唔係有錢仔，家境處於中游，只係父母有搵錢能力唔使我負擔，𠵱家冇咗棵遮蔭大樹就要拼搏，未來除專注做好音樂學校，仲做獨立歌手。」
新人被鬧係必經
問到TVB難忘點滴?Brian稱頭3年拍劇經常被導演粗口問候最難忘：「嗰時興鬧人，個個做嘢好認真，演員落場唔啱就捱罵，我會走錯位阻人收工。」他好記得11年前拍《大藥坊》時，陳展鵬、林子善、韋家雄為提他，係咁打眼色。「呢啲事唔會打擊到我喎！喺片場要將自己放到好低，係新人必經階段，我好抵得鬧，錯就要認，打就要企定，俾人鬧完下次咪學精囉，如果咁都睇唔開就好大鑊。」Brian經過14年「洗禮」已去到化境，「年紀越大越要保持心境平靜，近4年開始學習調節心情，因為情緒會影響到思考。我見前輩陳豪及黎耀祥喺片場都唔會對人指指點點，喺佢哋身上都學到嘢。」
體諒網民要宣洩
對於Brian外闖，網上有唔少聲音，有讚他高大威猛有條件，唔怕搵唔到食；亦有口賤網民留言話唔Care佢走唔走，只記得佢係「綠帽俠」！Brian聞言一臉愕然，笑住話自己好傳統，近8年冇睇網上留言，只係間中會聽下YouTuber嘅新聞評論：「我唔care呢啲留言，我又唔識你，唔會喺留言中生存，最重要係佢哋唔使負責任，鍾意講乜咪講乜囉。」Brian坦言𠵱家香港經濟唔好，市民壓力好大，他更深明大義說：「佢哋利用網絡去宣洩情緒，講完開心，畀佢哋發洩下都OK嘅，我起碼畀到你舒服啲呀，出嚟待人處世EQ比IQ重要，冇EQ乜都做唔到。」不過唔嬲還唔嬲，Brian覺得網民靠網絡宣洩唔健康：「按邏輯思考，我都唔會將快樂建築喺別人痛苦身上啦，咁可想而知佢哋係咩人？自身一定唔開心，所以唔使在意，要帶啲好嘅嘢畀人，咁自己先好㗎嘛。」
Brian又指藝人做每件事，觀眾都會有意見：「可能越多留言越好，證明受關注，佢哋肯花10秒時間留言畀我，我真係多謝你啦。好似Taylor Swift咁，IG留言都唔係個個正面啫。」至於網民話唔識佢，他再笑說：「唔識我唔緊要，𠵱家知咪得囉，大家可以重新認識我。」最後他透露和女友感情穩定，但未有結婚計劃，未來兩人將拍住上做善事。
最新回應