專欄│奧運足球一定要睇

歐國盃同美洲盃啱啱都完結咗，球迷們可以唞一唞，但係我哋啲講波佬，已經急不及待準備緊奧運足球，雖然佢唔係國際足協轄下A級賽事，表示球會可以選擇唔放人去踢，但係都好多U23嘅年輕球員，可以睇一睇佢哋嘅實力。

首先最驚喜嘅新聞當然係日本隊，佢哋今次參賽並無任何一個超齡球員，全部都係真正U23，上屆都叫有遠藤航，但而家連佢都無，今次大多數起用嘅都係日本國內嘅球員，外流嘅球員少之又少，最大名嘅係效力不來梅嘅前鋒佐藤惠允，但佢喺球會出場次數都係非常之少，而隊長藤田讓瑠喺U23亞洲盃既係隊長，仲要攞埋MVP，絕對值得留意。

法國陣容星味十足

今年最強都可以話法國，誓要喺自己主場衝擊到金牌，由隊長拿卡錫迪領軍，帶住一班後生仔好似文奴干尼、米高奧利斯、卓基等上屆U21歐國盃開始打響名堂，仲要今季下半季表現脫胎換骨嘅桑馬迪達，成隊法國隊最後生車路士嘅中場烏高祖克胡，亦都有近年都開始冒起得好快嘅萊比錫後防勞基巴，星味就夠晒啦，唔知踢落去又會點呢？

啱啱攞完歐國盃冠軍嘅西班牙，見到巴塞嘅拉明耶馬幾咁犀利，即管睇下佢哋今次帶兩個巴塞嘅一後一中，都係成日有得出嘅古巴斯同費文盧比斯，再加上今屆西甲都有啲表現唔錯嘅球員如艾歷加西亞同米基爾古迪亞利斯等，又可唔可以食住個勢攞埋奧運金牌？

今屆奧運都有唔少球星㗎，仲有曼城嘅祖利安艾華利斯，摩洛哥嘅夏基美都會參賽。睇下奧運又會唔會有一番龍爭虎鬥之餘，再彈出一兩位新星？Willhappy