专栏│奥运足球一定要睇

欧国杯同美洲杯啱啱都完结咗，球迷们可以唞一唞，但系我哋啲讲波佬，已经急不及待准备紧奥运足球，虽然佢唔系国际足协辖下A级赛事，表示球会可以选择唔放人去踢，但系都好多U23嘅年轻球员，可以睇一睇佢哋嘅实力。

首先最惊喜嘅新闻当然系日本队，佢哋今次参赛并无任何一个超龄球员，全部都系真正U23，上届都叫有远藤航，但而家连佢都无，今次大多数起用嘅都系日本国内嘅球员，外流嘅球员少之又少，最大名嘅系效力不来梅嘅前锋佐藤惠允，但佢喺球会出场次数都系非常之少，而队长藤田让瑠喺U23亚洲杯既系队长，仲要攞埋MVP，绝对值得留意。

法国阵容星味十足

今年最强都可以话法国，誓要喺自己主场冲击到金牌，由队长拿卡锡迪领军，带住一班后生仔好似文奴干尼、米高奥利斯、卓基等上届U21欧国杯开始打响名堂，仲要今季下半季表现脱胎换骨嘅桑马迪达，成队法国队最后生车路士嘅中场乌高祖克胡，亦都有近年都开始冒起得好快嘅莱比锡后防劳基巴，星味就够晒啦，唔知踢落去又会点呢？

啱啱攞完欧国杯冠军嘅西班牙，见到巴塞嘅拉明耶马几咁犀利，即管睇下佢哋今次带两个巴塞嘅一后一中，都系成日有得出嘅古巴斯同费文卢比斯，再加上今届西甲都有啲表现唔错嘅球员如艾历加西亚同米基尔古迪亚利斯等，又可唔可以食住个势攞埋奥运金牌？

今届奥运都有唔少球星㗎，仲有曼城嘅祖利安艾华利斯，摩洛哥嘅夏基美都会参赛。睇下奥运又会唔会有一番龙争虎斗之馀，再弹出一两位新星？Willhappy