Marco@P1X3L被細佬嫌麻煩：淨係識話唔係咁 兩兄弟拍《巴絲》互爆私隱丨獨家
2024-07-18 07:00 
23歲Marco（葉振弘）@P1X3L跟19歲細佬葉振延（Manson）早前去荷蘭拍旅遊節目《巴絲Let’s go歐》。兩兄弟由細到大感情唔錯，嗌交都只為開冷氣等小事，要他們互數優缺點，Marco大讚資優細佬自細記性超強，難怪可14歲就順利跳班入讀大學，但Marco卻被細佬大爆私隱，直指他事事要求高，但又冇具體意見，「唔知佢究竟想點，真係好麻煩！」採訪：杜杜 服裝:AAPE BY *A BATHING APE®️
Marco自從去年到非洲拍完《無制限探險隊》後，對旅遊節目有種「唔慌係好嘢」的恐懼，所以獲 《巴絲》製作組相邀時，就算知道可任揀去歐洲一國家拍攝，他亦反應不大，只是即搵細佬做決定。反而是Manson興奮得一口答應，「嘩！有人請去歐洲咁着數，拍咩都冇問就話去啦！哈哈！」揀荷蘭就是兩兄弟商量結果，Marco解釋：「呢個地方我哋比較熟識，我阿爸有9兄弟姐妹，有好多兄弟姐妹都喺荷蘭生活，有半個家族都喺嗰邊，但我哋兩個又未試過同時間去荷蘭，一齊去應該會幾好玩。」
細佬自爆跳班原因
兩兄弟形容從小到大感情一直不俗，此行要日對夜對，又有不少任務要完成，他們只是經常互窒卻沒有衝突，Manson笑話：「啲任務冇乜難度，反而似一齊去旅行咁，真係幾好玩㗎！」而他們平日相處時間亦好多，除愛一齊打機外，Marco有自己房間，也會經常會黐住細佬孖鋪。不過他們都試過因此孖鋪，搞到炒大鑊，「細佬超級怕熱，我就超級怕凍，嗰次我病病哋返到去瞓，點知佢開到好大冷氣，因為咁就嘈起上嚟。」Manson補充，「我係鍾意開到雪房級冷氣，又唔知佢病咗，結果我哋嗌咗成10分鐘都唔停，要等到阿爸阿媽返嚟調停。」
要求兩兄弟互揭優缺點，Marco讚細佬細個已經顯露有141分IQ的資優生條件，記性極好兼零缺點，「佢記性好好，特別係記數字，真係最叻。」Manson就好謙話，「我係數學好啲，其他中文嗰啲科都唔係咁叻。」Manson解釋升中前，意外發現智商這樣高，「我細個讀書唔係特別叻，只係升中時媽咪諗住面試時多啲資料，於是帶我去做IQ測試。」講到以14歲之齡跳級入讀香港理工大學投資科學及金融分析科，Manson笑指最初目的只為想朝早不用早起，「中一時有日阿爸揸車送我返學，我同佢講好辛苦唔想咁早起身，佢就話『你讀到大學就可以自己揀科，就可以唔使咁早囉』，所以決定休學2年專心考DSE。」Marco當時正值參加《全民造星II》，但也感受到細佬好瞓身，「佢日日由朝到晚喺度狂操卷，我見到啲卷都驚，佢真係好有決心。」 為了不想早起身返工，19歲Manson決定繼續升讀碩士兼幫教授做研究，「做研究唔使早起身，仲可以賺錢去旅行嘛！」
同家人講P1X3L隊友是非
輪到Manson講大佬，先讚為人夠細心，「佢見到阿媽咳兩聲，就會即刻倒杯暖水畀佢，我要阿媽出到聲叫我倒，我先會好勉強咁去做。」Marco唔完全認同，「我對人細心啲，但係好多時做嘢就唔夠細心，成日因為唔小心搞到出事。」講到大佬缺點，Manson唔怕死竟然直指Marco易發脾氣好麻煩，「佢對好多嘢會有意見，對好多嘢要求好高，但佢淨係識話唔係咁樣呀！完全唔知佢究竟想點，真係好麻煩！」估唔到Marco畀細佬爆私隱，竟然完全唔嬲，仲好認同話：「我係幾麻煩，會話唔係咁唔係咁，但係連我都唔知自己其實想點，表達唔到出嚟。」
平時好脾氣的Marco，仲自爆返到屋企都幾多嘢呻，基本上同細佬冇乜秘密，「我有咩唔開心，譬如畀P1X3L隊友Phoebus（吳啟洋）和George（歐鎮灝）激親，就會返去同屋企人講，我會講到好大聲全屋人都會知，不過我真係好唔開心，就會粒聲都唔出。」Marco仲話細佬是私人音樂顧問，「佢都好鍾意音樂，有8級鋼琴同聲樂底，我啲歌都會成日畀佢聽畀意見。」問到Manson有冇入行打算？他就話完全唔抗拒，「有機會都可以試吓，不過有時見佢開工都幾辛苦。」不過Marco竟然反對，「我一個做呢行好啦！佢都係圈外發展比較好，唔想兩兄弟都咁唔穩定。」Manson笑言：「咁我第時我可以負責畀多啲家用，哈哈！」
最新回應