Marco@P1X3L被细佬嫌麻烦：净系识话唔系咁 两兄弟拍《巴丝》互爆私隐丨独家
2024-07-18 07:00 
23岁Marco（叶振弘）@P1X3L跟19岁细佬叶振延（Manson）早前去荷兰拍旅游节目《巴丝Let’s go欧》。两兄弟由细到大感情唔错，嗌交都只为开冷气等小事，要他们互数优缺点，Marco大赞资优细佬自细记性超强，难怪可14岁就顺利跳班入读大学，但Marco却被细佬大爆私隐，直指他事事要求高，但又冇具体意见，「唔知佢究竟想点，真系好麻烦！」采访：杜杜 服装:AAPE BY *A BATHING APE®️
Marco自从去年到非洲拍完《无制限探险队》后，对旅游节目有种「唔慌系好嘢」的恐惧，所以获 《巴丝》制作组相邀时，就算知道可任拣去欧洲一国家拍摄，他亦反应不大，只是即搵细佬做决定。反而是Manson兴奋得一口答应，「哗！有人请去欧洲咁着数，拍咩都冇问就话去啦！哈哈！」拣荷兰就是两兄弟商量结果，Marco解释：「呢个地方我哋比较熟识，我阿爸有9兄弟姐妹，有好多兄弟姐妹都喺荷兰生活，有半个家族都喺嗰边，但我哋两个又未试过同时间去荷兰，一齐去应该会几好玩。」
细佬自爆跳班原因
两兄弟形容从小到大感情一直不俗，此行要日对夜对，又有不少任务要完成，他们只是经常互窒却没有冲突，Manson笑话：「啲任务冇乜难度，反而似一齐去旅行咁，真系几好玩㗎！」而他们平日相处时间亦好多，除爱一齐打机外，Marco有自己房间，也会经常会黐住细佬孖铺。不过他们都试过因此孖铺，搞到炒大镬，「细佬超级怕热，我就超级怕冻，嗰次我病病哋返到去瞓，点知佢开到好大冷气，因为咁就嘈起上嚟。」Manson补充，「我系锺意开到雪房级冷气，又唔知佢病咗，结果我哋嗌咗成10分钟都唔停，要等到阿爸阿妈返嚟调停。」
要求两兄弟互揭优缺点，Marco赞细佬细个已经显露有141分IQ的资优生条件，记性极好兼零缺点，「佢记性好好，特别系记数字，真系最叻。」Manson就好谦话，「我系数学好啲，其他中文嗰啲科都唔系咁叻。」Manson解释升中前，意外发现智商这样高，「我细个读书唔系特别叻，只系升中时妈咪谂住面试时多啲资料，于是带我去做IQ测试。」讲到以14岁之龄跳级入读香港理工大学投资科学及金融分析科，Manson笑指最初目的只为想朝早不用早起，「中一时有日阿爸揸车送我返学，我同佢讲好辛苦唔想咁早起身，佢就话『你读到大学就可以自己拣科，就可以唔使咁早罗』，所以决定休学2年专心考DSE。」Marco当时正值参加《全民造星II》，但也感受到细佬好瞓身，「佢日日由朝到晚喺度狂操卷，我见到啲卷都惊，佢真系好有决心。」 为了不想早起身返工，19岁Manson决定继续升读硕士兼帮教授做研究，「做研究唔使早起身，仲可以赚钱去旅行嘛！」
同家人讲P1X3L队友是非
轮到Manson讲大佬，先赞为人够细心，「佢见到阿妈咳两声，就会即刻倒杯暖水畀佢，我要阿妈出到声叫我倒，我先会好勉强咁去做。」Marco唔完全认同，「我对人细心啲，但系好多时做嘢就唔够细心，成日因为唔小心搞到出事。」讲到大佬缺点，Manson唔怕死竟然直指Marco易发脾气好麻烦，「佢对好多嘢会有意见，对好多嘢要求好高，但佢净系识话唔系咁样呀！完全唔知佢究竟想点，真系好麻烦！」估唔到Marco畀细佬爆私隐，竟然完全唔嬲，仲好认同话：「我系几麻烦，会话唔系咁唔系咁，但系连我都唔知自己其实想点，表达唔到出嚟。」
平时好脾气的Marco，仲自爆返到屋企都几多嘢呻，基本上同细佬冇乜秘密，「我有咩唔开心，譬如畀P1X3L队友Phoebus（吴启洋）和George（欧镇灏）激亲，就会返去同屋企人讲，我会讲到好大声全屋人都会知，不过我真系好唔开心，就会粒声都唔出。」Marco仲话细佬是私人音乐顾问，「佢都好锺意音乐，有8级钢琴同声乐底，我啲歌都会成日畀佢听畀意见。」问到Manson有冇入行打算？他就话完全唔抗拒，「有机会都可以试吓，不过有时见佢开工都几辛苦。」不过Marco竟然反对，「我一个做呢行好啦！佢都系圈外发展比较好，唔想两兄弟都咁唔稳定。」Manson笑言：「咁我第时我可以负责畀多啲家用，哈哈！」
最新回应