《超時空情歌》美國黑膠版《想見你》丨頭條戲場

穿越題材長拍長有，韓劇就特別鍾意，近期就有《背著善宰跑》，更令入行14年的男主角邊佑錫由三線變巨星。美國浪漫奇幻電影《超時空情歌》亦係玩穿越，唔係無時無刻回到過去，只會透過音樂跟過去連結，即係你聽到一首歌會諗起某個人或某件事，然後穿越去有關時空，即係台劇《想見你》啦?冇錯。但電影時間有限，劇情冇咁複雜，亦冇壞人阻住晒，就係一套圍繞音樂同記憶，深情又浪漫嘅愛情電影。(已上架）撰文：廖思慧    劇照提供:Disney+

Harriet多次穿越，可以改變一啲小問題，但要救男友就唔容易。

歌好聽，男女主角又靚，雖然故事薄弱，可以一睇。

每到夜晚，Harriet都努力聽歌玩穿越去救男友。

睇過一套戲、聽過一首歌、某個港鐵站等過一個人，甚至乎一句話都可以連結好多回憶。戲中女主角Harriet (Lucy Boynton飾)係音樂人，跟同屬音樂人的有型仕Max (DCU的「新超人」David Corenswet飾)相遇音樂節，一拍即合繼而拍拖再火速同居，音樂人之家有大量黑膠，飯後餘慶節目係黑膠碟循環播，調暗埋燈光，小小音樂世界加靚爆情侶，煙煙韌韌本來幸福到死。

靚靚Harriet喺音樂節同Max相遇。

Harriet努力搵歌想回到過去意外時間救男友。

好羨慕外國仲有黑膠唱片店
因為一個意外，Max走了，Harriet傷心到有情緒病，要去情緒支援小組聚會，藉分享去釋放自己，期間識到同病相憐的David (Justin H。 Min飾)，一個失去至愛，一個長別至親，互相安慰再行埋一齊，但最重要問題，Harriet會因為聽到某首同Max一齊聽過嘅歌，就會穿越去當時，由開頭好驚到之後習以為常，更可以隨意在穿越期間拔走所有播放歌曲的電源回歸正常。然後，Harriet有一個大膽諗法，就係想辦法搵返Max出意外時聽緊嘅歌，然後拯救佢。

David及Harriet都係情緒病人，唱片店偶遇，其實幾襯。

Harriet曾經不斷用音樂懷念已逝男友，過程好痛苦，好彩最終都搵到可以互相救贖的David。

Harriet曾經不斷用音樂懷念已逝男友，過程好痛苦，好彩最終都搵到可以互相救贖的David。

好多評論話韓裔美籍的Justin好老土，都唔係吖，互flirt戲都幾有Feel。

Harriet同Max以往相處越開心，前者穿越就越痛苦。

Harriet同Max嘅回憶畫面都好Sweet。

電影Sell RomCom，係幾甜但一啲都唔Com，全片瀰漫憂傷，最慘女主角愛音樂，要靠音樂治療傷痛，但同時又怕工作時聽到某首歌回到過去，要長戴Headphone保平安。故事簡單，有靚仔靚女睇，歌又好聽，好羨慕外國仍然有黑膠唱片店。由《初戀無限JAM》已經超鍾意女主角Lucy，戲中嘅佢著得有型又有味道，妝又Cute，屬輕甜糖水愛情片，臨瞓前睇一流。