《造星V》盧信宥馬拉香港瞓身搞慈善活動　父親病逝有感想幫更多病人丨獨家

2024-07-12 06:00

《造星V》出身的盧信宥（Ash）早前由馬來西亞來港，出席由他發起的「Love is All愛無限」慈善活動，充當一日店長義賣曲奇。他還趁機到即將清拆的九展留影，感觸這個香港起步點快成歷史。香港行只短留兩日，因要即飛台灣跟音樂人開會，籌備今年推出的全新單曲。採訪：杜杜

Ash這段日子忙於為創立演藝學校打點，要長時間留在馬來西亞。

Ash發起「Love is All愛無限」活動，全因年前父親病逝，很想幫助更多病人，故不時聯同馬來西亞的藝人探訪慈善機構，但覺得力量有限，「我同經理人Kawaii傾開，可以舉行籌款活動，畀更多人認識一啲慈善機構，所以計劃每年都會舉辦呢個活動，幫助更多不同團體。」除在港舉行義賣活動，還會於本月底在家鄉舉行慈善騷，收益會變成物資捐贈「香港結節性硬化症協會」及家鄉的「扶貧醫療康復中心」。

Ash為發起「Love is All愛無限」活動，任一日店長義賣曲奇。

Ash在活動上，跟黃曦桃合唱《我一個空虛孤單發覺夜漫長》。

6月底Ash和Kawaii在吉隆坡舉行「Love is All愛無限」啟動禮。

不捨起步點九展

訪問當日Ash專登到即將清拆的九展留影，「呢度真係我嘅起步點，係我嚟香港第1個認識嘅地方，亦係最熟同逗留最長時間嘅地方，拍《造星V》大半年，真係有好多珍貴回憶，諗起下次再嚟香港，呢度已經消失好唔捨得。」此行他只留兩天再轉飛台灣，未有機會約《造星V》兄弟去九展留影及聚舊。

Ash難得來港，趁機跟九展講再見。

Ash在九展的ViuTV錄影廠，留下不少難忘回憶。

去年完成《造星V》後，Ash在港推出跟黃曦桃的合唱歌《我一個空虛孤單發覺夜漫長》後便返老家發展，他解釋要忙於打理創立的演藝學校，「學校成立咗一段時間，舊年搬咗個大啲地方，多咗好多課堂，有好多嘢要打點，要多啲時間留喺嗰邊，冇時間嚟香港，不過差唔多上軌道，下半年應該會見我多啲。」他預告即將有新搞作，「趕去台灣就係為籌備新單曲，依家收緊歌，同嗰邊嘅音樂人研究吓揀咩歌，因為想有廣東同國語版，希望今年內可以推出。」