陳葦璇做收納師開網台吸更多Fans 分手好灑脫狠掉前度物品一件不留丨獨家

2024-07-12 08:00

跳唱歌手陳葦璇再次挑戰慢歌，推出以草藥命名的單曲《左手香》，比喻要狠狠地了斷已逝感情才能重新出發，她稱對感情事一向灑脫，會將前度所有事物割捨，因為呢項能力助她開拓收納達人事業，更開網台分享收納心得，吸納大量音樂以外的粉絲支持。採訪：杜杜攝影：林賓尼

葦璇因為夠決斷，對舊情還是收納都好易做到斷捨離。

葦璇收到《左手香》歌詞覺得歌名好有趣，後來才發現跟草藥有關，「了解咗藥用功能，要剪葉再整爛佢放喺傷口上，先做到消炎止痛作用。」放於愛情上，即是斷捨離，「當呢盤植物係一段舊感情，要剪咗佢，先可以重新嚟過。」不過，她跟拍拖多年的舞蹈員男友感情穩定，要記返舊情傷來演繹新歌。

葦璇錄《左手香》獲監製舒文教路用表情幫助表達，「把聲再soft啲。」

葦璇演繹《左手香》，要靠舊失戀經驗助投入。

葦璇上次推出跳唱歌《高敏族》，已是1年前的事。

最強斷捨離

講返舊情史，葦璇自言分手後可以好灑脫，「一分手就會掉晒前度送畀我嘅所有嘢，相都會掉晒，我想快啲走出嚟，既然決定咗就做得徹底啲，少少都唔會留低。」她認為性格決斷，助她失戀後好快重新出發，亦令她開拓到新事業，「感情同搬屋一樣，都可以做到好多斷捨離，唔需要嘅就唔留，我就係個咁決斷嘅人，所以先做到收納達人。」

葦璇開心透露獲電視台邀拍有關收納的節目。

葦璇以收納達人身份開網台，最開心可以吸納唔留意樂壇的人，「有啲觀眾未必知道我係歌手，我有時長頭髮有時短頭髮，仲要改埋名，哈哈！可能有啲後生觀眾，唔知道陳葦璇就係陳嘉欣，除非一路睇住我大，或者好早認識我嘅人，所以呢個頻道幾好，畀更多觀眾認識我。」她笑言希望現在執屋，將來可更入屋，「尋日去澳門做嘢，老闆個女同補習老師補緊習，佢哋過嚟say hi，講起我做收納師，個補習老師都話有睇！可能幫返歌曲宣傳，網絡平台真係太厲害！」