鍾意做處長定局長？鄧炳強百答後生仔「疑難雜症」︱Kelly Online
2024-07-11 16:32 
保安局局長鄧炳強又同一班後生仔傾偈，話說鄧炳強收到秘書通知，一班暑假嚟保安局實習嘅青年約佢開會，點知原來係突擊訪問，當中問題更加係多到答唔晒，例如問局長嘅MBTI、最辛苦嘅時刻、鍾意做處長定局長等等。
鄧炳強今日（11日）喺社交平台上載影片，內容係佢同一班保安局實習生嘅訪問對答，開場第一問同學仔想知道局長嘅MBTI，鄧炳強就話好多人覺得佢係「E人」（外向型），但佢就認為自己係「I人」（內向型），因為佢好鍾意自己一個人喺屋企入面睇吓書、做吓運動。
出任保安局長之前，鄧炳強係警務處處長，同學仔就問佢鍾意做處長定局長多啲，鄧炳強回答話「我鍾意做一個做過處長嘅局長」，答案令到同學仔好無奈；同學仔之後再問局長一個好難答嘅二選一問題──鍾意「警隊藍」還是「中國紅」，鄧炳強嘅回答仍然得體，佢話香港係一個五光十色嘅地方，除咗「警隊藍」「中國紅」，佢總鍾意「國安紫」添。
談及上任兩年最辛苦嘅時刻，鄧炳強就話係23條啱啱開始做諮詢嗰陣，有一日聲沙、眼睛發炎、肩周炎、痛風一齊嚟，認為嗰一日係最辛苦。不過，23條立法係佢最有成功感嘅項目。
最新回應