梁靖琪湊仔唔打扮阿佘睇唔過眼怒扯髮夾後生8年老公常被讚靚仔丨獨家

2024-06-14 07:00

梁靖琪（Toby）入行20年受盡負評，終在話題劇《家族榮耀之繼承者》演命苦敗家千金「Nana」一鋪翻身，有網民更以「本人鄭重向梁靖琪道歉」為題出po，讚她演技好，加上爸爸兼該劇總監製梁家樹畀叻大讚，Toby講起都眼濕濕。另外，談到細8年的靚仔老公施雋賢（Jonathan），41歲的Toby承認要keep住狀態有壓力，更爆笑重演因打扮求其，被好姊妹佘詩曼怒扯髮夾一幕。採訪：杜杜攝影：Stanley、林賓尼髮型:Michael lam@Beijing hair culture 化妝:劉柏麟@Stephenmakeup 服裝:farfetch 場地:Bela Offices

Toby入行20年一直在負評中成長，憑「Nana」得到認同令信心大增。

Toby曾因冇自信駕馭角色而拒演「Nana」，「好驚做得唔好，『Nana』冇中間位，又破壞佘詩曼同林峯，好大壓力。」因為導演一句，「諗唔到邊個做得比你更好」，令她決定一試，但又給自己超大壓力，特別是情緒失控戲份，「唔只手震，我拍到缺氧，要跑入廁所嘔。」開播時「Nana」不討好，令她好擔心，甚至唔睇留言，「醜係必然，但話差就驚嘞！點解呢？好似返番轉頭，《蝕日風暴》到《家族1》啲人都話OK喎！睇完留言好大壓力，唔想影響情緒，唔開心小朋友會知，到開始有人讚先夠膽睇。」

演「Nana」有大量情緒崩潰戲，Toby壓力大到作嘔。

Toby跟羅嘉良這場「父女」戲，是其中被讚一幕。

曾想轉行放棄做幕前

到「Nana」死前戲份，Toby終得到觀眾認同，更有觀眾公開向她道歉，令她覺得辛苦都值得。回想入行不久已受盡負評，Toby坦認不好受，「其實好難頂㗎！但觀眾鬧我啲嘢係啱，例如聲調、演技，自己慢慢反省，亦有好多人提點我，捱到20年都好犀利，咁樣算唔算EQ高呢？！雖然好唔開心，但睇化咗，今次真係賺咗好多。」因為一直被打擊，她想過轉行，「最想放棄嗰時開咗婚紗及wedding planning公司，但真係好鍾意做戲，咪唔好放棄囉！」

身世複雜的「Nana」，慘被哥哥害死。

2010年Toby 開婚紗及wedding planning公司。

因為長期負評纏身，Toby最心痛影響父母，「尤其我做咗媽媽更加明白，嗰時爸爸媽媽叫我唔做呢行，你估佢哋唔傷心咩？！唔出聲啫！」今次有好成績，Toby最感動得到父親梁家樹認同，更講到眼濕濕，「嗰個網民道歉Po係爸爸send畀我，佢話『你睇吓呢個網民講乜嘢』，然後畀個叻叻我，好開心，呢個世界實有人鍾意同唔鍾意我，但屋企人認同係好緊要，特別係我太在乎佢哋，爸爸畀叻叻就好開心。」她打算將經歷跟兩個囝囝分享，「同佢哋講，好多人可能會批評你，覺得你唔好，但你唔好放棄。」

Toby被爸爸梁家樹讚，忍不住眼濕濕。

Toby得到爸爸梁家樹認同，特別感動。

老公後生成扮靚動力

Toby獲讚後，對演戲更有信心，但未敢全情投入，始終分別4歲和2歲的囝囝太細。適逢拍攝《家族》期間老公生日，全家陪她到馬來西亞開工順道慶祝。她認為兒子相伴，有助抽離「Nana」沉重情緒，「一入房係Roman同Rian媽咪，就抽離咗，好多場就算係夜戲，返去聞吓佢哋就好放鬆，舒服晒！」

2019年，Toby跟Jonathan結婚，先後誕下Roman和Rian。

Toby笑指老公Jonathan較她更貪靚。

41歲Toby同33歲老公Jonathan相差8載，兩年前她接受本報訪問時，正準備生第2胎，當時很擔心自己走樣，跟老公差距更大，這次見她已回復狀態，她笑言多得「Nana」，「佢啲衫好短又薄，有特登減，1星期做足3、4日運動，但係就憔悴咗，出晒眼袋又乾，實在冇完美，希望網民明白。」她笑指老公年輕亦是她努力keep的動力，「老公呢排好勤力，成日做facial又脫癦，我話『你唔使嘛老公，你好細個咋噃，我都未整你整』。」Jonathan經常被網民讚靚仔，她坦認老公比她更貪靚，搞到好姊妹佘詩曼都睇唔過眼，「我真係好求其，我阿媽有時都話我『你真係唔好着到咁樣』，但接送小朋友真係好早，我唔理個頭，夾個夾就算。」Toby更模仿阿佘發火扯走髮夾一幕，「佢好忟憎咁話『你唔好再戴個夾啦』，似唔似呀？我好多表情都學佢，哈哈！」