區文詩澄清非忽然富貴：生活一直無憂 8年前壓力大生到成頭瘡淡出娛圈丨獨家

2024-06-01 07:00

41歲的區文詩（Angela）相隔8年重操故業，返港台主持《Music Angel》，透露當年因壓力致身體響警號離開娛樂圈，𠵱家大個女識諗咗，可以取得平衡。翻查報道，Angela總跟忽然富貴聯上關係，她強調入行以來一直沒經濟壓力，亦有搞生意，所以生活可以隨心所欲，生活無憂並非近年嘅事。採訪：杜杜攝影：Stanley

Angela不願透露感情狀況，更澄清拍拖29次的報道，「意思係好多次，唔係實則數字，認真拍得幾個。」

Angela自16歲拍電影《無人駕駛》入行，之後做電台節目，表面多姿多采，其實不斷掏空自己，「要留意周圍有冇嘢可以喺節目講，去旅行要影3批相，分別自己keep、放社交平台及畀相熟記者，好怕錯失每個工作或曝光機會，連家居相都公開埋。」最後壓力致身體響警號，「額頭生咗好多壓力瘡，皮膚科醫生話呢啲係無形壓力。」

Angela之前因為身心都攰，放棄做了13年的DJ工作。

Cookies前隊友有新聞傳出，傳媒最愛問Angela回應。

想拍戀愛真人騷

因思想和心態轉變，Angela決定復出，「歲數轉咗字頭，去咗人生另一階段，呢8年試咗好多嘢，經歷社會運動同疫情，對好多嘢睇法亦唔一樣，可以享受工作，唔似以前模式要不斷追趕，電台同事搵我，覺得OK可以試吓。」復出唔代表要跟以前一樣，無底線公開自己所有嘢。「影家居嗰啲未得，諗返以前公開晒有啲匪夷所思，屋企其實係我最後防線。」另外，她最想試真人騷，「好鍾意睇但未試過，拍求偶嗰啲應該幾有趣。」

DJ工作不能經常離港，Angela離職後狂去旅行。

Angela在這8年學了很多技能，包括滑雪。

對於被指忽然富貴，Angela強調經濟條件一直唔差，「之前做玲玲姐（麥玲玲）節目，佢都提返『同你第1次認識，你揸住架開蓬車嚟開工』，唔係你哋𠵱家口中嘅生活無憂，其實一路以嚟都唔差。（家底厚？）只可以話屋企冇乜好大負擔，得返媽咪。」而她亦有搞生意，只是沒在社交平台出po，更指網媒經常誤報消息。「普通人返工都唔會po返工相啦！其實係放大咗，家居照就有報導話係我屋企，其實係朋友屋企。」