鄭則仕向苦主講Sorry：搵機會鬧返我片場火爆王鬧人無數名冊厚過字典丨獨家

2024-05-31 07:00

73歲鄭則仕(Kent哥)相隔5年重返TVB拍《神耆小子》，大讚拍劇過程前所未有咁開心。拍過唔少經典作品，演戲半世紀的Kent哥承認後生時意氣風發，更經常在片場鬧人，被鬧圈中人名冊成本字典咁厚，他坦言對出口之言絕不後悔，但願意對鬧過嘅人講句Sorry。記者翻查資料，2021年江美儀受訪時自爆1997年首拍ATV劇《肥貓正傳》時，曾被Kent哥用粗口狠勁問候，句Sorry唔知包唔包埋畀江美儀呢？採訪：方騫平攝影：鄧國良場地：南華會甘棠燒鵝

73歲的鄭則仕睇到好化，覺得面對現實先係生存之道。

Kent哥重提鬧人舊史。

他強調自己唔記仇。

Kent哥同老婆報告行蹤。

兩公婆透明度好大。

Kent哥最愛打保齡。

「老戲骨」鄭則仕於《神》劇為新人冼靖峰及羅毓儀助攻，更發揮精湛演技，上演疑似被樊亦敏「派帽」時，在短短一分鐘戲就有多層次的演法，獲讚演技好厲害。Kent哥承認今次拍劇非常enjoy，「演出前齊晒劇本，又搵到青春活力嘅冼靖峰『換血』，好少見到咁肯聽人講嘢、領略高、有天份嘅新人；仲有蕭正楠、曹永廉、樊亦敏、陳榮峻、魯振順，佢哋有能力、有層次、有功底；羅毓儀都好得意，佢將個人性格代入角色中。」

拍TVB劇集《神耆小子》同演員好夾得埋。

Kent哥大讚新人冼靖峰領悟力高。

樊亦敏爆Kent哥如馬評家，每晚點評演員演技。

Kent哥在一分鐘戲就有多層次的演法。

下一秒係咁。

Kent哥讚羅毓儀好得意，將個人性格代入角色中。

5年前跟邵美琪拍過《街坊財爺》。

自嘲落後睇得好化

盧宛茵(Madam)曾被後輩大膽教演戲，Kent哥就未試過，笑說：「我都希望有呀！」Kent哥更自嘲係落後的後輩，嗰啲係前浪嚟(前衛年青人)：「佢哋唔使尊重我，因為人與人相交冇先同後，冇高同低。講真Madam最後係咪冇聽先？人哋講兩句咪由得佢囉，講完都係做返自己啫。」他強調𠵱家睇得好化：「面對現實先係生存之道，違背生態圈，只會生存能力不足，要投入落去，可能有9句錯1句啱呢？唔使咁負面。」

Kent哥未試過似盧宛茵咁，曾被後輩大膽教演戲。

Kent哥會自得其樂。

Kent哥扮乜都神似。

Kent哥越來越玩得。

好搞馬。

Kent哥明白生存之道。

製作人要承擔責任

江美儀曾於訪問大爆陳年舊事，稱27年前拍ATV處女劇《肥貓正傳》做女一時，被Kent哥用粗口狂鬧，更句句夾雜性器官，當年深受傷害！自稱睇得好化的Kent哥坦承後生時血氣方剛，會意氣風發啲火爆啲，直言俾佢鬧過嘅人太多，足足有成本字典咁厚。事隔多年，Kent哥覺得要搞清楚，做演員好簡單，唔會鬧人，但只要孭上監製、導演、製作身分就唔同，完全係第2個狀態：「拍得唔好、唔啱會over budget要負上責任，而且做嘢有規矩，要有尊重尺度，冇就要用粗口鬧你，做乜要尊重你？同埋要諗多層，畀錢寫劇本係要拍好你，唔係拍衰你，全心為你好。以往畀我鬧過嘅人太多，唔順氣，我同你講返聲『sorry對唔住』；人哋呻，會尊重佢嘅選擇，但要問心『有果必有因』，鬧你只係結果，希望講埋個因出嚟，咁有冇話畀人聽點解要鬧你呀？要搞清楚先！」

27年前，鮑起靜及當年新人江美儀演以他為內容的劇集《肥貓正傳》。

江美儀好記得曾被鄭則仕用粗口喪鬧，但依然參與恩師聚會。

當年同江美儀都多對手戲。

周潤發及鄭文雅曾參與Kent哥自編自導自演的電影《何必有我？》。

《何必有我？》續集《肥貓流浪記》由Kent哥監製及主演，張曼玉做女主角。

《肥貓流浪記》Kent哥有唔少經典場口。

當年張曼玉已係當紅女一。

Kent哥執導的《獄中龍》，有劉德華拍住濕身透視上陣的新人黎姿。

劉德華、黎姿有嘴咀戲。

1989年《瀟洒先生》由Kent哥執導，跟關之琳有唔少對手戲。

1994年鄭伊健及鍾麗緹拍《人如傳說》。

當年金城武在《人如傳說》中做男電。

1987年有張曼玉、羅明珠及呂方合作嘅《心跳一百》。

Kent哥1986年執導電影有袁潔瑩、黎姿演出的《飛躍羚羊》。

1994年有李嘉欣及馬景濤主演的《海角危情》。

李嘉欣係大美人。

1990年劉德華、譚詠麟、林俊賢主演嘅《富貴兵團》都係Kent哥執導。

片中梅艷芳演護士。

幽默回應頻傳死訊

Kent哥對於鬧人舊史有感而發，希望公平啲，更語帶相關：「俾我鬧過嘅可以記恨，搵機會鬧返我唔緊要，不過，好大細超啫，我鬧你係幾十年前嘅事，𠵱家仲鬧緊你嗰啲，你就『阿爺』、『大哥』咁叫，仲讚佢哋好嚴謹、好認真…妖！」問到鬧得最勁係邊個？Kent哥自言唔係一個記仇嘅人，可能10分鐘就忘記，而且對出口之言唔會後悔，「人哋唔提我都唔記得，自己入行時日日都俾導演由朝鬧到晚，我唔錯，佢邊有得鬧？錯咪改返好囉，所以反而要多謝佢，我宗旨係對事不對人。」問到近年多次傳出死訊，Kent哥對於假新聞答得幽默：「冇所謂啦，係死咗喇，耶穌都可以復活啦！點解我唔可以？唔好中計，唔好回應啲搞亂你嘅假新聞。我反而好嬲疫情期間冇戲拍、冇錢搵；以前純搵食，𠵱家仲未死又恨做，趁有市場能力為自己『跑山』。」