《叛逆美聲》意大利搖滾巨星瀨晒嘢成長史丨頭條戲場

69歲意大利搖滾巨星Gianna Nannini的傳記電影，故事由童年開始橫跨30年。出身富裕家庭的Gianna從小愛音樂，但嚴父只想個女打好網球，做運動員為家族增光，女主角細個話唔到事就陪你癲吓，越嚟越大就當然睬你都傻，好記得Gianna口頭禪「我想做嘅事，就會去做」。全片有好多憂傷，好多毒品，一個關於堅持，排除萬難的追夢故事。(已上架)   撰文:廖思慧    劇照提供:NETFLIX 

少女時的Gianna被迫打網球，Hea玩比賽一幕激死老竇。

Gianna好有才華，亦不斷遇到好人幫佢。

Gianna 出生於Siena，家有父母及一弟，自小對音樂特別有感覺，完成父親的所有學習要求，包括讀書同練網球，就會扮揸咪跟住電視唱歌，媽媽覺得好可愛，一臉惡形惡相的父親看在眼裡非常唔鍾意。由女童變少女，Gianna更熱愛音樂，自彈自唱功力亦越來越勁，反抗父親能力亦不斷升級，好記得有一幕，父親命令Gianna即場除下迷你裙，甚至立即剪爛，你就會預計到Gianna將會頭也不回，有咁遠走咁遠。

因為鬱鬱不得志，覺得失望的Gianna難得獲父親關心。

Gianna對髮型師Carla(Selene Caramazza 飾)一見鍾情，但得到後又唔珍惜。

Gianna推出首張專輯，封面是自由神像拎住自慰棒，老竇嬲到震。

原生家庭的影響力
因為唔甘心亦唔想成為父親期望下的大家閨秀，大個女的Gianna孭住結他離開大屋，隻身到米蘭發展音樂事業，有創作才華又有一把靚聲，最重要後生，冇嘢輸啦。電影著重Gianna的心路歷程，點樣向父親證明自己脫離屋企都可以成功，及如何在理想及現實中作出平衡。Gianna曲風獨特，歌詞憤世嫉俗又好貼地，講吓愛情、性同毒品，聽到新相識朋友嘅快樂人生計劃好有Feel，即刻寫首歌出嚟，連處女專輯封面都係自由神像拎住自慰器，相當玩嘢。

電影唔係Sell勵志，甚至覺得被毒品包圍，過度博愛的Gianna糟蹋自己，故事線亦薄弱，睇唔出Gianna有幾為音樂努力，但全片瀰漫搖滾加自由Feel，所有歌亦好好聽，人物好正又可愛，但真心拍得麻麻。

Marc(Stefano Rossi Giordani飾)係Gianna的惡夢。

因為突破唔到自己，Gianna沉迷毒海。

Gianna(Letizia Toni飾)初入行做歌手形象好普通，越多Fans就越靚。

《星島申訴王》推出全新項目「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰https://bit.ly/3uJ3yyF

想睇更多精彩內容，請立即瀏覽「區區有申訴」活動專頁，https://bit.ly/41hgS9E

緊貼最新最快新聞資訊，請立即下載星島頭條App：https://bit.ly/3Q29Vow