吳日言長期臥床好焦慮：香港乜都貴 40歲高齡陀第3胎暴增近50磅丨獨家

2024-05-18 07:00

40歲，已有一子一女的吳日言（Yan）陀第3胎體重激增40多磅至160磅，雖然挺住超級巨肚但仍努力搵奶粉錢，親力親為打點牛肉麵店生意，3寶港媽慨嘆：「香港市道低迷，生活逼人，一家5口加埋工人姐姐，開支真係好大。」高齡陀B更令她有情緒問題，另外她又自爆已有plan B，唔排除今年帶仔女去英國升學放眼世界，逼不得已留低老公Barry在港「跑數」。採訪：方騫平

Yan冇避孕亦冇諗過40歲都中獎，一家人開心迎接新生命。

6歲大女竟指媽咪腹中BB唔襯她。

快將兩歲細佬成日指住Yan個肚，期待話baby。

挺住巨肚拍廣告。

吳日言係勤力KOL。

有過2次生產經驗，快將臨盆的吳日言懶懶閒，連BB房、BB衫及毛巾等都未執好，只執好備有孕婦衛生用品、腰封、水泡等的「走佬袋」：「經驗之談，因為順產完傷口好痛，唔可以接觸到張櫈，一定要有頸枕當水泡墊住坐10日。除此之外產婦肚皮真係好鬆㗎，要有返條腰，腰封紥肚都好緊要。」

Yan執好生仔「走佬袋」，預備隨時入院。

順產後傷口好痛，唔可以接觸到張櫈必須要坐頸枕。

姊姊好錫細佬。

養家「跑數」交由老公負責。

溫馨之家。

產前焦慮身形變化

雖然今次第3次揀順產生B，但Yan依然緊張：「最難忘生大女時痛足10小時；生細仔時已好好多，只係痛4個鐘，仲唔算係10級痛，但要出九牛二虎之力屙咗9次，好記得醫生話，如果第10次都唔得就要開刀，嗰次真係好險呀！希望今次會再好啲。」高齡產婦的Yan坦言每生一胎會越走樣，坦言𠵱家肥到似恐龍，加上年紀越大，肚皮再鬆多啲：「呢胎臨產前明顯負荷好大，雙腳好腫，行兩步經已好攰好辛苦，成日攤喺床休息。」衍生產前情緒問題：「大肚婆陀得辛苦係會有種焦慮，不論身體變化及外形改變都會影響情緒，加上之前有妊娠糖尿，生完BB後成為糖尿病患者，要嚴格控制飲食，會唔開心，好彩產前抑鬱又唔算係咁嚴重。」Yan承認好怕產後變得又肥又醜，問到身形改變怕唔怕老公唔like？她即「要仔唔要佬」說：「佢唔like我唔緊要呀，至少有仔女like我嘛，咁餵人奶修身都快嘅。」

Yan陀第3胎體重激增40多磅至160磅。

Yan要老公體驗大肚婆苦況，好搞笑。

摸住老婆個巨肚。

陀住兩個大西瓜老公Barry試圖彎身剪腳指甲。

可惜挑戰失敗。

Yan指每生一胎會越走樣。

18年前Yan做歌手時，曾跟Krusty組合(左一及二)、傅穎做過《森美小儀歌劇團Big Nose》。 11

當年冬菇頭髮型是Yan的icon。

19年前的吳日言與張敬軒。

陪子女到英國求學

Yan透露第3胎是意外懷孕：「初時諗過生3胎，冇刻意計劃，亦冇避孕，心諗『邊會咁快有呀？』點知喺細仔一歲多啲就『中咗』。」Yan強調年紀唔細，3個夠晒數，問到會否要求老公做結紥？她大笑說：「咁搞笑？唔使結紮咁慘啩。哈！」養小朋友唔容易，她慨嘆香港乜都貴，開支真係好大，故兩公婆另有計劃：「大女今年6月派位，9月升小一，萬一佢考唔到心儀小學，私校學費又咁貴，不如將學費預算用喺英國升學，到時我會過去『1打3』做全職媽媽，陪住佢哋成長，留低老公在港為養3條『化骨龍』嘅1200萬繼續『跑數』。」不過，Yan強調唔係移民：「我唔想用移民兩個字去縛死自己，居留隨緣，其實主要係陪小朋友去讀書，為佢哋將來打算，自己都做晒呢個心理準備，雖然兩公婆分開兩地，但我覺得分開吓都唔係壞事，小別勝新婚嘛。」

去年9月開學日，兩公婆帶埋細仔送囡囡返學。

月前Yan到英國探訪旅居英國的董敏莉。

Yan有心理準備往英國做全職媽媽。

同老公結伴去英國感受生活。

Yan2016年與老公Barry結婚。

小店經營難求支援

Yan和老公於尖沙咀重慶大廈商場內，合力搞台灣牛肉麵及珍珠奶茶店一年，連裝修亦兩個人一手一腳做，對於近期食店出現結業潮，她慶幸小店仲撐得住：「好彩累積咗本地熟客，仲有遊客先可以頂得住，而且口碑及業績有增長，不過，因為用咗7位數私己錢，好希望兩年內回到本，期望政府可以出手幫到我哋呢啲中小企，始終唔係大集團經營會有難度，好需要支援。」