沈宗賢不強求搵對象似女神李佳芯 執馬拉髮型屋決心留港發展唱廣東歌丨獨家
2024-05-11 07:00 
馬來西亞過江龍沈宗賢參加《中年好聲音2》最終奪第7名，已獲簽約TVB的他，決心放棄當地事業留港發展。上月及今日（11日）先後舉行兩場粉絲見面會的他，希望將來能舉辦個人演唱會，目前最想推出首支廣東歌，若唱埋劇集主題曲就更好。對於外界比他更關心感情狀況，宗賢坦認視李佳芯為女神，但搵對象不強求，最緊要溝通舒服。採訪：杜杜 攝影：Stanley
從小愛唱歌的宗賢，小學6年級已首次參加歌唱比賽，中學更經常代表學校到其他學校PK，攞過多次冠軍的他，甫畢業便參加當地電視台的歌唱比賽，最終奪得第4名，之後到民歌餐廳聽歌卻被老闆嘗識順利入行，「喺民歌餐廳聽歌，個歌手認得我，叫我不如試唱一首，台下反應好好，老闆就叫我做駐場歌手，就係咁樣入咗行。」由於他當時是髮型師學徒，為追夢要兩邊兼顧相當吃力，「嗰10年其實好攰，朝早整頭髮到8點收工，夜晚再去由9點唱到12點收工，但嗰時民歌餐聽唔多，但歌手好多，唱歌機會好難有。」
實現離世外婆夢想
宗賢坦認在馬來西亞當了23年歌手，早已失去對唱歌的熱情，來港參加《中年2》終拾回初心，「以前不斷接受客人點唱，冇咗靈魂好麻木，變成人肉點唱機，唱咗23年真係為唱而唱，冇咗個火，開始懷疑係咪做緊自己鍾意嘅嘢，甚至為咗唱歌放棄段感情值唔值得呢？！經過比賽慢慢撻返着。」不過他最開心可以實現已離世外婆夢想，「TVB嘅舞台我一直好恨踏上，細個外婆帶住我睇TVB，我嘅廣東話都係睇TVB學返嚟，新年大年初一播香港啲騷，見到張學友、郭富城跳舞唱歌，嗰時外婆見我成日跟住唱，就話『你第日有冇機會上到去呢』，依家我終於做到，雖然外婆已經走咗，相信佢一定會睇到。」最終以第7名完成賽事，他已覺好滿意，「諗住自己未必入到10強，嚟到決賽已經係超額完成。」比賽中最大得着，首先是令本身不敢跳舞的他開始識郁，「以前係企住唱快歌，哈哈！完全唔會有任何舞步。」另外參賽期間被封為「重炮手」的他，學識要控制把聲，「喺Pub唱歌周圍好嘈，一定要有power唱，唔係會聽唔到唱咩，久而久之變成習慣，唱歌會好大聲，比賽我一唱把聲好爆，嚇到肥媽彈起身，之後學識好似唱《普通人》，會用好soft方式嚟唱。」
比賽時宗賢曾公開當年為追歌手夢放棄一段情，41歲仍是單身，令媽咪相當擔心，就連其他參賽者和粉絲都替他肉緊，紛紛努力為他作媒，他也覺得好搞笑，「好多人同我講，話個妹單身會唔會考慮？或者話介紹啲親朋戚友畀我，連我阿媽都幫我公開招親，好多謝大家咁關心，哈哈！」他坦認性格內歛，較難搵對象，希望遇到活潑開朗的女友，外形上最理想似女神李佳芯，但他不會強求，「眼大，身形中等，望落順眼就可以，其實最緊要溝通舒服。」不過他最抗拒反而是跟圈中人拍拖，「好驚有拗撬，我睇過太多男女朋友都係同行，唱唱吓突然走咗落台唔唱，有時可能結他手同個歌手拍拖，結他手突然唔彈走咗去，我唔想有呢啲衝突，私事影響到公事，單身都幾好，依家都係專注事業，感情就順其自然」
恨唱TVB劇主題曲
已簽約TVB的宗賢，已決定全身投入香港發展，原來當時為了參賽，早已放棄了馬來西亞的事業，就連髮型屋都執埋，「我係個唔可以有顧慮嘅人，我做一樣嘢就一定要專注，我唔喺髮型屋員工自然唔會咁落力，啲生意越嚟越差，每個月都蝕，我喺香港又冇工作，增加咗好大負擔，所以狠狠哋執咗佢。」未來目標，他最想能推出廣東歌，「我本身喺馬來西亞都有作歌，但都係國語歌，嚟到香港想出返首歌廣東歌，當然做到TVB劇集主題曲就最正，但填埋廣東詞就要幫手，真係好難。」長遠他當然希望可以開騷，「我嚟香港都未夠1年，有呢班粉絲已經好感激，離自己做迷你演唱會仲有距離，儲吓粉絲先，下個目標可以搞到500或1000人嘅騷。」
宗賢留港以來，最感激一班粉絲一路支持，「好感激一個外國人嚟到香港比賽，竟然有班粉絲支持我，我喺馬來西亞唱咗23年根本冇粉絲，我未搞粉絲過粉絲聚會。」為了答謝粉絲，他上月舉行了首次粉絲見面會，「好驚訝差唔多成百人嚟，真係好感動，大家好錫我。」由於未能滿足一眾粉絲要求，而適逢今日（11日）母親節前夕，他決定再辦一場粉絲見面會，要求粉絲帶同母親一同出席，順道答謝一直很支持他的媽咪，「感激佢由19歲收養我之後，一直陪我行呢條音樂路，老實講係睇唔到將來，但佢都好願意陪我行，無論結果係點都義無反顧。」他想好到時送歌給媽咪，「佢好鍾意聽張學友嘅《相信她，關心她》，到時會唱嚟送畀佢。」他還預備好母親節禮物，「送錢就最實際，其實佢咩都有，最緊要佢身體健康（母親曾患癌換過骨髓）。」
《星島申訴王》推出全新項目「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰https://bit.ly/3uJ3yyF
想睇更多精彩內容，請立即瀏覽「區區有申訴」活動專頁，https://bit.ly/41hgS9E
《星島頭條》新網站有更多精彩內容：http://www.stheadline.com/
最新回應