沈宗贤不强求搵对象似女神李佳芯 执马拉发型屋决心留港发展唱广东歌丨独家
2024-05-11 07:00 
马来西亚过江龙沈宗贤参加《中年好声音2》最终夺第7名，已获签约TVB的他，决心放弃当地事业留港发展。上月及今日（11日）先后举行两场粉丝见面会的他，希望将来能举办个人演唱会，目前最想推出首支广东歌，若唱埋剧集主题曲就更好。对于外界比他更关心感情状况，宗贤坦认视李佳芯为女神，但搵对象不强求，最紧要沟通舒服。采访：杜杜 摄影：Stanley
从小爱唱歌的宗贤，小学6年级已首次参加歌唱比赛，中学更经常代表学校到其他学校PK，攞过多次冠军的他，甫毕业便参加当地电视台的歌唱比赛，最终夺得第4名，之后到民歌餐厅听歌却被老板尝识顺利入行，「喺民歌餐厅听歌，个歌手认得我，叫我不如试唱一首，台下反应好好，老板就叫我做驻场歌手，就系咁样入咗行。」由于他当时是发型师学徒，为追梦要两边兼顾相当吃力，「嗰10年其实好攰，朝早整头发到8点收工，夜晚再去由9点唱到12点收工，但嗰时民歌餐听唔多，但歌手好多，唱歌机会好难有。」
实现离世外婆梦想
宗贤坦认在马来西亚当了23年歌手，早已失去对唱歌的热情，来港参加《中年2》终拾回初心，「以前不断接受客人点唱，冇咗灵魂好麻木，变成人肉点唱机，唱咗23年真系为唱而唱，冇咗个火，开始怀疑系咪做紧自己锺意嘅嘢，甚至为咗唱歌放弃段感情值唔值得呢？！经过比赛慢慢挞返着。」不过他最开心可以实现已离世外婆梦想，「TVB嘅舞台我一直好恨踏上，细个外婆带住我睇TVB，我嘅广东话都系睇TVB学返嚟，新年大年初一播香港啲骚，见到张学友、郭富城跳舞唱歌，嗰时外婆见我成日跟住唱，就话『你第日有冇机会上到去呢』，依家我终于做到，虽然外婆已经走咗，相信佢一定会睇到。」最终以第7名完成赛事，他已觉好满意，「谂住自己未必入到10强，嚟到决赛已经系超额完成。」比赛中最大得着，首先是令本身不敢跳舞的他开始识郁，「以前系企住唱快歌，哈哈！完全唔会有任何舞步。」另外参赛期间被封为「重炮手」的他，学识要控制把声，「喺Pub唱歌周围好嘈，一定要有power唱，唔系会听唔到唱咩，久而久之变成习惯，唱歌会好大声，比赛我一唱把声好爆，吓到肥妈弹起身，之后学识好似唱《普通人》，会用好soft方式嚟唱。」
比赛时宗贤曾公开当年为追歌手梦放弃一段情，41岁仍是单身，令妈咪相当担心，就连其他参赛者和粉丝都替他肉紧，纷纷努力为他作媒，他也觉得好搞笑，「好多人同我讲，话个妹单身会唔会考虑？或者话介绍啲亲朋戚友畀我，连我阿妈都帮我公开招亲，好多谢大家咁关心，哈哈！」他坦认性格内敛，较难搵对象，希望遇到活泼开朗的女友，外形上最理想似女神李佳芯，但他不会强求，「眼大，身形中等，望落顺眼就可以，其实最紧要沟通舒服。」不过他最抗拒反而是跟圈中人拍拖，「好惊有拗撬，我睇过太多男女朋友都系同行，唱唱吓突然走咗落台唔唱，有时可能结他手同个歌手拍拖，结他手突然唔弹走咗去，我唔想有呢啲冲突，私事影响到公事，单身都几好，依家都系专注事业，感情就顺其自然」
恨唱TVB剧主题曲
已签约TVB的宗贤，已决定全身投入香港发展，原来当时为了参赛，早已放弃了马来西亚的事业，就连发型屋都执埋，「我系个唔可以有顾虑嘅人，我做一样嘢就一定要专注，我唔喺发型屋员工自然唔会咁落力，啲生意越嚟越差，每个月都蚀，我喺香港又冇工作，增加咗好大负担，所以狠狠哋执咗佢。」未来目标，他最想能推出广东歌，「我本身喺马来西亚都有作歌，但都系国语歌，嚟到香港想出返首歌广东歌，当然做到TVB剧集主题曲就最正，但填埋广东词就要帮手，真系好难。」长远他当然希望可以开骚，「我嚟香港都未够1年，有呢班粉丝已经好感激，离自己做迷你演唱会仲有距离，储吓粉丝先，下个目标可以搞到500或1000人嘅骚。」
宗贤留港以来，最感激一班粉丝一路支持，「好感激一个外国人嚟到香港比赛，竟然有班粉丝支持我，我喺马来西亚唱咗23年根本冇粉丝，我未搞粉丝过粉丝聚会。」为了答谢粉丝，他上月举行了首次粉丝见面会，「好惊讶差唔多成百人嚟，真系好感动，大家好锡我。」由于未能满足一众粉丝要求，而适逢今日（11日）母亲节前夕，他决定再办一场粉丝见面会，要求粉丝带同母亲一同出席，顺道答谢一直很支持他的妈咪，「感激佢由19岁收养我之后，一直陪我行呢条音乐路，老实讲系睇唔到将来，但佢都好愿意陪我行，无论结果系点都义无反顾。」他想好到时送歌给妈咪，「佢好锺意听张学友嘅《相信她，关心她》，到时会唱嚟送畀佢。」他还预备好母亲节礼物，「送钱就最实际，其实佢咩都有，最紧要佢身体健康（母亲曾患癌换过骨髓）。」
《星岛申诉王》推出全新项目「我要赞佢」栏目，现诚邀市民投稿赞扬身边好人好事，共建更有爱社区。立即「我要赞佢」︰https://bit.ly/3uJ3yyF
想睇更多精彩内容，请立即浏览「区区有申诉」活动专页，https://bit.ly/41hgS9E
《星岛头条》新网站有更多精彩内容：http://www.stheadline.com/
最新回应