Anson Lo新歌唱出愛情觀激動到喊　願為愛情放棄名利

2024-04-17 22:05

MIRROR正忙於世界巡迴演唱會，但盧瀚霆(Anson Lo)出發前先錄好新歌《深閨》，《深閨》由徐浩作曲、監製，黃偉文填詞，是Anson Lo暫時最喜歡自己的一首慢歌。歌詞內容簡單直接地道出，當愛上一個人之後，可以為對方變成一個黐家的人，被對方獨佔，甚至放棄名利。Anson Lo坦言歌詞完全說中了他的心態：「歌詞其中一句：『拒絕再做凡間千人迷』，好Relate到自己，同埋佢令我思考到，如果有一日我真係拍拖，係咪要放下自己工作上嘅Anson Lo？係一首好Personal嘅慢歌，所以我喺錄音室唱嘅時候係有唱到喊。」

Anson Lo新歌《深閨》MV有靚人靚景。

Anson Lo新歌《深閨》MV喺巴黎取景。

Anson Lo眼中巴黎夠浪漫。

Anson Lo首次踏足巴黎。

有靚景更易投入MV拍攝。

巴黎之行寓工作於娛樂。

去到巴黎食好西。

Anson Lo又幻想，如果自己拍拖，都應該幾似Wyman所寫，會全神貫於對方身上，他說：「因為我係巨蟹座，係一個Home Guy（住家男人），好鍾意留喺屋企，拍拖的話，放工都會即刻返屋企，然後喺屋企食飯睇戲，瞓覺攬埋一齊；假期都未必出街，兩口子一齊煮下嘢食飲杯咖啡，就已經好好。因為如果我鍾意一個人，都好想24小時黐住佢，做乜都OK。」對於Anson Lo來說，《深閨》所說的愛情觀與他本人很吻合，但他相信，歌詞同樣說中了大眾當情到濃時，對於愛情的執迷與痴迷，他相信大家聽到歌詞，一樣會身同感受。

甚至放棄名利。

當盧瀚霆愛上一個人之後，可以為對方變成一個黐家的人。

新歌唱出Anson Lo愛情觀。

巴黎鐵塔下拍MV

完成英國站巡唱後，特地與團隊走到巴黎拍攝歌曲MV，配合浪漫、Fashion又Cozy的感覺。整個拍攝過程中，Anson Lo最喜歡在巴黎鐵塔拍攝的場口，他說：「夜晚可以睇到巴黎鐵塔唔同嘅燈光閃法，好靚！同埋我哋拍攝嘅地方只係隔住一條河仔，可以好近咁望到巴黎鐵塔，又大好靚，又襯首歌，𠵱家可以拍埋入《深閨》MV裡面，有剔咗Bucket List嘅感覺。」被問到又要巡演又要拍MV，體力上可以應付得到？Anson Lo坦言：「每次都係同自己講，應付唔到都要應付，因為做完巡演，話唔攰都係講緊大話，但只要係自己好期待嘅作品，攰就唔係咁大問題。」

夜晚可以睇到巴黎鐵塔唔同嘅燈光閃法，好靚。

Anson Lo最喜歡在巴黎鐵塔拍攝的場口。

好近咁望到巴黎鐵塔，又大好靚，又襯首歌。

完成英國站巡唱後，特地與團隊走到巴黎拍攝歌曲MV。

倫敦街頭留影。

不忘周圍打卡。

這次是Anson Lo首次踏足巴黎，所以除了拍MV以外，他亦有在當地遊覽，他分享道：「有周圍睇下名勝、景點，買咗少少嘢，又有探索下啲Café，坐低飲下嘢食下嘢，又或者喺條街行下。其實今次巡演又好，喺巴黎拍MV又好，最鍾意做嘅嘢唔係買嘢，而係喺條街度行，因為喺香港一落樓就上車去工作目的地，好少喺條街度行，我好想喺唔同國家嘅街上面行，感受下嗰個國家嘅Vibe係點樣，可以見到好多人唔同嘅面貌，做人處事方式，都會好好奇，齋行都好有趣好好玩。」