馮素波離巢最唔捨得張員工證 TVB冇責任養你一世咪當長期飯票丨獨家

2024-04-03 08:00

79歲馮素波上周在社交網公布已離開TVB，對於離開合作超過30年嘅電視台，波姐並冇依依不捨，但就好留戀張員工證：「好多同事都走咗啦，而且前兩年都係改簽一年一騷，冇工作唔使返去，所以同公司冇乜關係，跟高層更加冇乜感情，員工證似member card可返去食Tea探吓朋友，𠵱家最可惜係連會籍都冇埋。」採訪：方騫平攝影：鄧國良場地：Colour Brown

波姐唔再受一年一騷合約約束，有更多自由空間。

波姐難得自由自在。

波姐決定要活出精彩人生。

波姐明白年紀越大，劇本唔會再為她而寫。

馮素波今年將出自傳及申請做粵劇及個唱。

馮素波當年由馮美基喺亞視挖到TVB，12年前曾轉投王維基旗下的香港電視網絡，兩年後獲曾勵珍力邀重返TVB：「每年續約都係藝員科同事跟我傾，我同高層唔熟，樂易玲唔會理到我呢啲層次。」

波姐話TVB制度已不適合年長演員。

波姐演技冇得輸。

王維基身上得益良多

波姐憶述電話中「分手」一刻來得乾脆俐落：「藝員科同事打嚟，我斬釘截鐵話第日都係好朋友，對方冇挽留反而尷尬話『咁有需要時你會唔會返嚟拍戲？唔會嬲我哋呵？』我爽快答應唔會鬧TVB，因為都做咗幾十年啦。」波姐又發表「助養論」：「其實千祈唔好當TVB係張長期飯票，有責任要養你一世，即使養大個仔都唔會養到你死啦，就算佢得我都未必肯，可能出面有更大發展呢，正如當年王維基招手時游說我出去睇吓，佢話我『儘管有把遮擋雨，但太大雨都頂唔順會濕身，其實你好有價值』，唔出去係唔知道自己嘅潛力，喺佢身上學咗好多嘢，原來個世界係咁。」她反而最唔捨得張員工證，會收起留念，未來會出自傳及申請做粵劇及個唱。

10年前過檔香港電視網絡拍《惡毒老人同盟》。

她明白今時今日TVB已改制：「而且年紀越大，劇本唔會再為我而寫，演出戲份唔會多，呢啲角色大可以留畀包薪藝員做，畀機會佢哋跑數還騷，呢啲係佢哋做生意方法，只要諗得通就明白。」她又提及兩年前一件趣事：「綜藝組話公司會開新節目畀機會我發揮才華，佢哋接見我時，追問我可以有乜發揮？我忍唔住反問：我喺呢間公司30年，入得嚟一定有才華唔通白支人工咩？係佢哋唔了解每個藝人，其實喺TVB個個演員都有才華，就算路人甲乙丙都係稱職嘅。」