KK媽《中音2》後享快樂人生下半場患癌生蛇又抑鬱身體瘋狂出問題丨獨家

2024-04-17 07:00

60歲林潔淇(KK媽)去年參加《中年好聲音2》，雖然100強止步，但一曲《舊夢不須記》感動了評判和觀眾，賺人熱淚。KK媽人生多波折，經歷兩任丈夫出軌，大女被保母虐待致死，抑鬱症令她鬱出重病，先後患乳癌及卵巢癌。不過，參賽後她搵到快樂及精彩人生，強調就算他朝兩腳一伸都會含笑而逝。採訪：方騫平攝影：朱偉彥

KK媽目前睇中醫調理身體，希望減輕生蛇後遺症。

KK媽形容舊夢不須記。

KK媽過住快樂人生下半場。

𠵱家KK媽笑口常開。

唯一生蛇後頭皮出現痕癢後遺症。

KK媽曾患乳癌，做過6次大手術，切除部份乳房；另外，她做小腸氣手術都經歷過搶救階段，多度徘徊生死邊緣，以為捱過難關，2015年開始，分別於盆骨及近耳仔位置兩度生蛇，她形容似被蛇咬有10級痛：「痛到行唔到瞓唔著，真係好想將患處一刀切走！就算𠵱家仍留有後遺症，夜深時腦後頭皮位置會痕癢，啱啱轉睇中醫，希望舒緩減輕困擾。」

2002-2003年患上乳癌，做咗3個大手術及30次電療。

44歲時已完成3個大手術。

接受兩次乳癌大手術及電療30次後北上睇中醫。

2017年做完小腸氣手術後要搶救。

2018年肩膊韌帶斷裂做手術。

滿手針孔。

曾急性胃抽筋入院。

月前腳趾骨裂咗，識得自我安慰。

可以含笑而逝
KK媽好記得不適入院檢查搵唔出源頭，醫生一度懷疑她癌病復發患腦癌及腎癌，直到第6日身上才有生蛇紅點，慶幸已再沒復發，但她希望大家能正視生蛇問題，尤其弱勢社群，除此之外，健康狀況算穩定。而自參加《中音2》後，KK媽認識到一班新朋友，獲唔少關愛，短短幾個月豐富了她的人生，「我𠵱家嘅快樂係過去60年總和，如同歌曲一樣舊夢不須記，呢半年除咗可以圓夢唱到歌，一班『中2生』都好照顧我，好似過年前腳趾骨裂咗，聚會時佢哋就同我按摩，又送椰子油畀我，真係好滿足，好溫暖呀。原來人好簡單，所以我同細女講『他朝兩腳一伸都含笑而逝』。」她更自爆𠵱家每天為回覆訊息，搞到三更半夜先瞓，她視為開心嘅陋習。