劉威煌終於識做人：藐我都會講多謝 古淖文經常叫佢「常威」唔再嬲 丨獨家
2024-04-12 08:00 
第一屆《超級巨聲》第5名的劉威煌，相隔15年再戰TVB《中年好聲音2》，雖然8強止步，但覺得比賽過程有得着更為重要。威煌分享由當年自我膨脹的巨星心態，變返只係鍾意唱歌的小歌手心路歷程，就算被古淖文叫他曾經好嬲豬嘅花名「常威」，他反而覺得有親切感，心態大不同。採訪：方騫平 攝影：鄧國良 場地：Suger K
《中音2》後有更多人認識劉威煌，受歡迎程度勁過當年，笑言有啲似《超級巨聲》感覺，不過，他唔再飄飄然，心態已調節返做個普通人：「以前唔識表達，見到人哋熱情打招呼會好驚好尷尬，仲會諗多咗，質疑對方來意；𠵱家個人好『地』(貼)，不論支持定藐我都會講句『多謝』，至少有留意過我；另外幫過我嘅所有人都要道謝。」
澄清冇被伍仲衡關照
劉威煌歌唱事業曾大起大跌，最後經不起輿論壓力，7年前唱完怨念歌《灰狗》後打算全面放棄唱歌，直至疫情期間開Live再唱：「當年最介意係批評我個樣似電影《九品芝麻官》嘅奸角『常威』(鄒兆龍)，但𠵱家覺得鄒兆龍都幾高大靚仔呀！參賽時古淖文用『常威』個名嚟笑我，我反而覺得係老朋友稱呼。今次都有負評指我同伍仲衡係buddy，所以先行到8強。我想講伍sir畀我係標準以下嘅15/16分，事實擺在眼前，我冇要求攞過同情分，即使參賽期間一齊食飯都共識唔合照，甚至唔提任何比賽話題，就算係點老友，佢冇必要因為劉威煌而搞衰自己，而我就孭住造馬罪名，咁會變成雙輸。」
已簽TVB歌星約的劉威煌認為今次係緣份令他再有唱歌機會，畀面嘅可以當他歌手，其實自己只係一個熱愛唱歌嘅普通人：「所以啱啱出嘅新歌《普通人》係唱出呢15年來嘅心聲，林夕嘅詞真係好勁，首歌係講每個人都有自己崗位，我冇高過人，但絕對冇比人低，做人唔好貶低及自我膨脹。」
《星島申訴王》推出全新項目「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰ https://bit.ly/3uJ3yyF
想睇更多精彩內容，請立即瀏覽「區區有申訴」活動專頁，https://bit.ly/41hgS9E
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
最新回應