胡慧冲扮幪面超人拍《最緊要好玩》MV向阿Sam致敬駕旋風號招搖過市找數丨獨家

2024-03-28 06:00

作為許冠傑超粉的「泰國通」胡慧冲(Roger)，昨天駕駛仿製幪面超人1號旋風號電單車，風馳電掣到泰國旅遊區，包括四面神外、唐人街、大皇宮附近、水門街、Siam Square等拍攝經典歌《最緊要好玩》MV向阿Sam致敬，更盡興地唱埋泰文版幪面超人歌，Roger認為，就算喺攝氏40度高溫下，着住焗汗嘅超人衫自High 12小時都係開心嘅。

仿製幪面超人1號旋風號電單車花費13000港幣。

扮到真駕駛。

記得要戴返個頭盔呀！

變身幪面超人1號駕駛旋風號電單車。

拍攝花費6500港元。

拍攝團隊10多人。

呢個MV拍得好大陣仗。

喺攝氏40度下扮超人焗到癲。

原來有拖車拖住行。

「開車」到曼谷景點打卡。

Roger手持《最緊要好玩》歌詞。

Roger向《星島頭條》解釋今次搞「大龍鳳」因由：「話說之前心血來潮花6萬泰銖（相等港幣13000蚊），喺泰國訂咗部仿照幪面超人1號旋風號電單車，仲攞晒行車證。當時承諾過，如果呢條『敗家仔開箱』短片瀏覽量超過10000人嘅話，就會喺街上風馳電掣找數，估唔到條片超過10萬人睇，於是貫徹超級偶像許冠傑『最緊要好玩』宗旨，駕駛電單喺市中心拍MV，向阿Sam致敬。」

Roger為敗家仔開箱短片承諾找數。

獲阿Sam賜個唱前座

不過，因為Roger唔識駕駛電單車，唯有好似拍戲咁，要租用拖頭拖住嚟行：「最後決定做得好好睇睇，自掏腰包花費3萬泰銖(約6500港元)，動用10多人嘅攝影團隊，3部攝錄機進行拍攝，拍足12小時，熱到濕咗兩件底衫，但沿途好吸睛。」因為冇戴頭盔拍攝，Roger喺片尾都要戴返個「頭盔」，用阿Sam語調溫提觀眾：「無論係歌神定泰神，揸車要打醒12分精神，揸電單車記得戴頭盔啦喂！」Roger形容今次最重要能圓夢：「好多幪面超人迷都渴望擁有旋風號電單車，更加希望電單車可以喺街上飛馳，慶幸有好多朋友幫助下成事。」另外，之前Sam向鄭丹瑞提出，搵Roger接受網上節目《健康旦》訪問：「訪問後阿Sam話要安排前排門票畀我，仲追問我睇邊場？但我堅持要真金百銀來支持偶像，嘩！但真係幾開心呀，兒時偶像竟然叫得到我個名，今時今日可以近距離接觸係感動嘅。」