《路基完》恭喜宋仲基終於識做戲丨頭條戲場

電影改編長篇小說，講述宋仲基飾演的「脫北者」路基完為生存，到比利時申請難民資格，期間遇到因家庭問題出走，自暴自棄的韓裔靚女瑪麗(崔成恩飾)，慘情加愛情加歐洲景色應該好易攞高分，奈何節奏太慢，片長2小時13分鐘，體感4個鐘，中間打咗好多鋪機都冇影響理解，故事弱，兜嚟兜去都未到終點，最後決定當愛情片嚟睇，舒服哂。(已上架) 撰文:廖思慧 相片提供:NETFLIX

已上架

初到比利時，基仔被嚴重欺凌，好多人嫌佢污糟邋遢都咁靚仔，真係無辜。

利申，本人唔係宋仲基迷，但佢每套作品咁啱都有捧場，韓劇《黑道律師文森佐》同《財閥家的小兒子》都非常好睇，但基仔一張娃娃臉實在礙事，奸唔到，老謀深算又唔夠，最慘爆發力極弱，簡單咁講，即係啲戲麻麻。

基仔本來獲北韓同胞做證，但被背叛，內心戲做得好好。

熱烈歡迎宋仲基演員
睇《路基完》宣傳訪問，原來7年前，宋仲基曾拒絕接拍此片，7年時間，佢經歷閃電結婚及離婚，被Fans狂鬧，廣告商嫌棄，再婚及做爸爸，人生閱歷豐富咗，演陰功脫北者即刻好有Feel，兜咁大個彎都係想讚基仔做戲好咗，真心恭喜。電影前半段是基仔的個人表演，睇住阿媽死，然後帶住遺憾遠走高飛，言語不通又人生路不熟，俾人欺凌、執垃圾食仲要瞓公廁，基仔演繹可憐蟲好到肉，跟同樣脫北的凍肉公司女同胞相處最好睇，特別帶出「無論世界有幾地獄都要努力活下去」的理念，共勉之。

因為唔夠証明佢係脫北者，基仔隨時要被遺返。

一直以為電影講舊時，即90及00年代的事，因為成個Tone都好懷舊，但當女主角從tiktok短片見到男主角被補，咦，原來講𠵱家，至中後段開始劇情大暴走，有地下賭博、有吸毒仲有黑幫槍戰，樣樣有啲但又唔深入，即係盆菜多料但冇味，可惜。好彩仲有愛情線，男女主角好靚，畫面又靚，原來係脫北者的愛情故事。

被背叛後，基仔努力打工儲錢，侍應洗碗乜都做。

兩人的愛情發展得好莫名其妙，無所謂啦，靚咪得囉。

基仔同北韓同胞嘅所有對手戲都好好睇。

佢就係瑪麗，阿媽死咗，好憎老竇，選擇自我放棄，有錢女真麻煩。

為咗救瑪麗，基仔大膽同黑幫對抗。

《星島申訴王》已推出全新項目「區區有申訴」，並增設「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰ https://bit.ly/3uJ3yyF

想睇更多精彩內容，請立即瀏覽「區區有申訴」活動專頁，https://bit.ly/41hgS9E

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ