何晉樂林智樂齊發圍勢要越來越紅潘靜文期待再做大騷司儀丨獨家

2024-03-01 06:00

何晉樂（Rock）、林智樂（Felix）、潘靜文（Sherman）去年各有新嘗試，展望龍年，Rock已遇到音樂上伯樂，希望今年可以發表創作歌曲；Felix開心透露今年開了靚頭，將會跟很多不同音樂人合作；Sherman主持《J Music》有好多得着，最想再做大騷司儀學嘢。採訪：杜杜攝影：譚志光

3人希望每個新年都在工作，證明演出機會不斷。

Sherman、Felix和Rock希望龍年心想事成，事業發展順利。

3人希望每個新年都在工作，證明演出機會不斷。

奪得叱咤生力軍男歌手銀獎及新城勁爆新人獎的Felix，好滿意去年發展，希望越來越紅，「開心出到兩首歌，攞到獎可以答謝好多愛錫我嘅人。希望可以吸納多啲受眾，多啲人認識我嘅音樂，因為每首歌都係團隊嘔心瀝血製作。」他又預告今年會有新搞作，「已收到驚喜，譬如好期待合作嘅音樂人，其中一個係Sherman啦！仲會延續上年，做好多唔同類型音樂節目，算係開咗個靚頭。」

Felix預告今年將會跟Sherman有合作計劃。

Felix推出《澀谷駅前等》後，預告會有新搞作。

Felix在兩個樂壇頒獎禮，都奪得新人獎。

主持《J Music》獲益良多

Sherman難忘去年推出首支單曲《永遠潘朵拉》，又跟張振朗合唱《似夢迷離》，還首次主持台慶，「做Live show腎上腺真係會升到好高，好考執生，係難得考驗，希望再有機會做大騷。」踏入新1年她開心再出歌，「都係自己idea。」又會繼續主持《J Music》，「開心做呢個節目，真係令我認識好多音樂人，做到一啲『聲夢』做唔到嘅crossover，真係學到好多嘢，希望長做長有啦！」

Sherman希望能夠keep住主持《J Music》。

Sherman繼《永遠潘朵拉》後，今年將推出跟海有關歌曲。

Sherman（後排右二）好榮幸有份主持台慶，希望未來再做大騷司儀。

Rock去年舉行Fans meeting外，還首次執導《深感榮幸》MV ，而主持《J Music》亦大受啟發，「點解人哋好短時間出到歌？或者有好多成績？會反思好多嘢。」去年他亦寫了很多作品，有望今年發表，「啲歌暫時仲喺電腦，因為怕羞未畀人聽過，但啱啱遇到個伯樂，會同我一齊創作，用佢嘅經驗提點我，希望啲經驗同作品今年可以用得着，到時再話畀大家知伯樂係邊個！」